Bojxona qo‘mitasi Raisi shu kunning o‘zida “Sirdaryo” chegara bojxona postida ham bo‘ldi.

Ushbu post orqali sentyabr oyining o‘zida 9.2 mingdan ziyod yuk avtotransport vositalari harakatlangan. Yaʼni, postdan har 4 daqiqada 1 ta yuk mashinasi o‘tmoqda. O‘tgan yilga nisbatan joriy yilda postda avtotransport vositalari harakati 10 foizga oshgan.

Qo‘mita raisi postdan turib, Qozog‘iston bojxona xizmati rahbariyati bilan telefon orqali bog‘landi va tomonlar mavjud vaziyatni o‘zaro muhokama qilishdi.

Tahlillarga ko‘ra, Sirdaryo viloyatidagi “Malik” (O‘R) - “Sirdaryo” (QR) hamda “Oq oltin” (O‘R) – “Selinniy” (QR) chegara bojxona postlarini xalqaro maqomga o‘tkazish va kechayu kunduz faoliyatini yo‘lga qo‘yish “Yallama” va “Sirdaryo” chegara bojxona postlariga tushayotgan yuklamani 30 foizgacha kamaytirish imkonini beradi.

Qolaversa, joriy yilning 4-choragida “G‘ishtko‘prik” chegara bojxona posti foydalanishga topshirilgach, “Navoiy” chegara bojxona posti orqali ham yuk mashinalarining harakatlanishi start oladi.

Pirovardida bularning barchasi “Yallama” chegara bojxona postiga tutash hududda tez-tez kuzatilayotgan navbatlarning to‘liq bartaraf bo‘lishiga olib keladi.