“Bojxona mergani” ishtirokchilari musobaqa oldidan tayyorgarlikdan oʻtkazildi

Joriy yilning 25-sentyabr kuni bojxona organlari xodimlari oʻrtasida oʻq otish boʻyicha “Bojxona mergani” musobaqasi oʻtkaziladi. Unda hududiy bojxona boshqarmalaridan saralab olingan xodimlar ishtirok etadi.

Musobaqa oldidan xodimlarning jangovar va jismoniy tayyorgarligi, oʻq otish boʻyicha bilim va koʻnikmalari sinovdan oʻtkazish maqsadida Bojxona qoʻmitasining Harbiy safarbarlik, jangovar tayyorgarlik va qoʻriqlash boshqarmasi mas'ullari tomonidan ishtirokchilar uchun maxsus tayyorgarlik mashgʻulotlari tashkil etildi.

Mashgʻulotlar davomida xodimlarga quroldan foydalanishning huquqiy asoslari, xavfsizlik qoidalari, qurolni toʻliqsiz qismlarga ajratish va qayta yigʻish tartibi boʻyicha zarur tushuncha va koʻnikmalar berildi. Shuningdek, ularning amaliy tayyorgarligi oʻquv qurollari yordamida sinovdan oʻtkazildi.

Eslatib oʻtamiz, ertaga ishtirokchilar oʻq otish boʻyicha oʻz mahoratlarini namoyish etadi. Musobaqa yakunida eng yuqori natijalarni qayd etgan gʻolib va sovrindorlar aniqlanib, Bojxona qoʻmitasi rahbariyati tomonidan munosib taqdirlanadi.