🍎🏃📚✏️
75-جی درس
فعل (4)
فعللرين قورولوشجا نوْعلارى
مرکب فعللر
ديليميزده مركب فعللرين چوْخ اهميتى واردير. بو فعللر حياتين ايسته يى و ديلين طبيعى اينكيشافى ايله باغليدير.
ديليميزده بير ايسيمله بير فعلدن يارانان مركب فعللر اوْلدوقجا چوْخدور. بو جهتدن ديليميز دونيانين ان زنگين ديللريندن بيريدير. ميثال اوٌچون توتماق فعليندن: باش توتدو, ال توتدو, اسير توتدو, ديله توتدو, سؤزه توتدو, سو توتدو, ...
ديليميزده مركب فعللر دؤرد نوْعدور:
1. ايدى-ايميش (دى-ميش):
بوگوٌن ديليميزده اوْلمايان "ايمك" فعليندن قالان بو كؤمكچى فعللر, فعلين امر و ماضى موطلق (شهودى كئچميش) دن باشقا بوٌتون فورمالاريله ايشله نيب, مركب فعللر يارادار: يازميش ايديم, گلميش ايديك, گله سى ايدى, گلير ايدى, گلميش ايميش, ...
2. اول-ائت- ائله:
بو قسما موستقيل اوْلان فعللر, كؤمكچى فعل كيمى, اكثرا آلينما ايسيم و بعضا صيفتلردن سوْنرا گليب, مركب فعللر يارادار: حاضير اوْل, امر ائت, رد ائله, ...
3. بيل: فعلين باجاريق فورماسى آدلانان "بيل" واسيطه سيله دوٌزلن مركب فعللر: يازا بيلديم, يازا بيلَرميشم, ...
4. ايسيم+فعل: ايسيم و فعلدن يارانان مركب فعللرى اوٌچ يئره آييرماق اوْلار:
الف) آدليق حالدا اوْلان ايسيملرله دوٌزلن مركب فعللر: ال چكمك, گؤز قوْيماق, باش وورماق, قولاق آسماق, ديل تؤكمك, ...
ب) يؤنلوك حالدا اوْلان ايسيملرله دوٌزلن مركب فعللر: باشا دوٌشمك, اله سالماق, ديله دوٌشمك, گؤزه گلمك, باشا گلمك, ...
ج) چيخيشليق حالدا اوْلان ايسيملرله دوٌزلن مركب فعللر: يوْلدان آزماق, الدن سالماق, گؤزدن دوٌشمك, باشدان سوْوماق, ...
د) نادير حاللاردا يئرليك حالدا اوْلان ايسيملرله ده مركب فعللر دوٌزلير: گؤزده-قولاقدا اوْلماق, آرخادا سوٌرونمك, ...
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5336
33
- ❤ 1