گؤزل‌لیک یالنیز گؤزل‌لیک

اۆچۆنجۆ کوْراوْغلو قورولتایی کئچن ایللرکی قورولتای‌لاردان داها گؤزل، مؤحتشم و عظمتلی کئچیریله‌رک، اؤز یئرینی تاریخی یادداشلاریمیزدا قازانیب، تکجه آذربایجانین میللی منفعتلری‌نی دۆشۆنۆب هئچ بیر گؤزلنتی گۆدمه‌دن، گؤزل و قالارغی بیر ایشلرین گؤرۆله بیله‌‌جگینی بیر داها خاطیرلاتدی.
چیملی/چاملی گؤلده یاشادیغیمیز گؤزل آن‌لاردان قیراق، بیر نئچه اؤزل صحنه‌‌ده گؤزلریمدن سئوینج یاش‌لاری دا آخدی.
گۆن‌اوْرتایا یاخینلاشدیقجا جمعیت قالابالیغی داها دا آرتماقدادیر.
کیمیسی نئچه ایلدن چوْخ گؤرۆشمه‌دیگی یوْلداشلارین یئنی‌دن گؤره‌رک سئوینجدن گؤزلری پاریلداییر، کیمیسی ایجرایی ایشلرله ال به یاخادیر.
بیر یاندا هۆنرمندلر چیخیش‌لاری‌نین داها گؤزل اوْلماسی اۆچۆن سوْن تمرین‌لرینی ائدرکن، یوردوموزو نئجه سئومکلرینی گؤزلرینده اوْلان ایشیلتی‌دان گؤرمک اوْلور.
بیر یاندان آذربایجان و تۆرک اویغارلیغی‌ایلا بزه‌نن غورفه‌لر دؤشنمکده، بیر طرفدن ده اؤلکه‌نین دؤرد بیر بوجاغیندان توْپلانان آشیقلار، اوْزانلار، باخشی‌لار(بخشی‌لر) و گؤزل گئییملی قوْناقلار گل - گئتده.
بونلار، ایللر بوْیو هر بیر میللی تؤرن‌ده گؤردۆیۆم صحنه‌لرایدی،
بیردن بیرینجی دؤنه گؤز یاشلاریمین نه‌دنی اوْلان قهرمانلار صحنه‌یه چیخیش ائدیرلر، نئچه نفر قوْجا کیشی و آغ بیرچکلی آنا....
قوْجالاردان بیریسی‌نین باشیندا اوْلان ایپ بؤرکۆ هابئله قارا پئنجه‌یی(کوْتو) و زمانه قهری آلتیندا اه‌ییلن بئلی‌ تام آذربایجانلی بیر کارکتئری جانلاندیریر، هابئله آرخاسینجا ووقارلا آددیم آتان نئچه گۆللۆ چادرالی آنا، اوْ توْرپاقلارین کیمه آیید اوْلدوغونو هابئله اوْ قورولتایین اصلی یییه‌لری‌نین کیم اوْلدوغونو وورغولاییرلار.
اؤزۆمۆ قوْشابولاقدان اسن اسیمه تاپشریب، کئفله‌نیرم، بیرآن گؤزلریم سوایله دوْلور، سانکی چیملی گؤلده اۆزۆرم،آنجاق قوْجانین چلیگی‌نین یئره دؤیۆلمک سسینی ائشیدیب، اؤزۆمه گلیرم.
تؤرن باشلاماق اۆزره، صندل‌لر دوْلوب و میللت توْپلاشماغا باشلاییر، گۆنش ساری تئل‌لرینی ایزه‌له‌ییجی‌لرین گؤزل رنگلی گئییم‌لرینه قاتیب،گؤزلری قاماشدیرسا دا، هئچ کیمسه سئن‌دن گؤز گؤتۆرمه‌ییر.
بیردن گؤزلریم گؤله ساری اوزانان جیغیر یوْلون آغیر قالابالیغا ساتاشیر، سانکی تیراختوْرون اؤنملی بیر اوْیونو وار. میللت دسته - دسته ییغیناجاغا ساری آخین ائتمکده، اؤزۆ ده بو یئنی دالغادا گلن‌لر، تیکان‌تپه‌نین باشی اوجا یئرلی‌لری‌دیرلر، بو یوردون بۆتۆن چتینلیک‌لری‌ایله ساواشیب، تۆرکۆن ابدی قالالاریندان بیریسی اوْلان شهرلرینی ترک ائتمه‌ییب قوْرویان قهرمانلار....
گؤز یاشلاریم ایختییارسیزجاسینا یئنی‌دن آخیر، یوْلداشلاردان بیری دئییر؛ گؤزۆنه چؤپ دۆشۆب دئیه‌سن،بتر سو آخیر. دئییرم هه گؤزل‌لیک و غئیرت آدلی چؤپ دۆشۆب.
اوْ دا حئیرانلیق‌لا اوْ مؤحتشم صحنه‌یه باخیر....
یئنی‌دن میللته ساری دؤندۆیۆمده، تؤر‌ه‌نین؛ یۆزلرجه یاشلی، اوْرتا یاشلی هابئله بالاجا بالانین میللی گئییم‌لرله بزه‌ندییینی گؤرۆب، اینانا بیلمیرم.
آخی کئچن ایل تکجه بارماق سایی‌سیندا ایگیدیمیز میللی گئییم گئیمیشدیلر، آنجاق بوگۆن؛ گؤزل رنگلی گئییملی قانداش‌لار، مدنیتیمیزین هله ده دیری اوْلدوغونو و تۆرکلۆک عنعنه‌لری‌نین یاشادیغینی بیر داها خاطیرلادیردیلار.
یولداشلاردان بیری دئییر نه زاماندان بری بئله اۆره‌یی کؤورک اوْلوبسان خبریمیز یوْخ، هئچ اؤزۆم ده بیلمیرم دئییب بیر قیراغا چکیلیب مؤحتشم ایفالارا باخماغا باشلاییرام آنجاق اوْلمور، اسکی یوْلداشلاری بیر - بیر گؤرۆب قوجاقلاشمالار ، اؤپۆش - گؤرۆشلر باشلانیر....
هاوا گئت - گئده سوْیوق‌لاشماغا ساری گئدیر، گۆن باتاراق، یئرینی آی‌ا وئردییینده، آی، اولدوزلاری گؤیدن یئره اله‌ییب، فئستیوالا داها دا گؤزل‌لنیر.
آرتیق گئجه، وار گۆجۆیله قارانلیغی هابئله سوْیوغو ییغیناجاغا ساری گؤنده‌ریب تؤرنی داغیتماق ایسته‌ییر، آنجاق اۆرک‌لری آذربایجان وارلیغی‌نین سئوگیسی‌ایله آلیشان ایگیدلری نه قارانلیق نه ده سوْیوق یئرلریندن اوْینادا بیلمیر.
گئت - گئده مراسیم سوْنا چاتماق اۆزره‌دیر، بیردن تیکان‌تپه ایگیدلری‌نین قایغی‌لاری اساسدا حاضیرلانان موستند ائکرانا چیخیر، گئتمک ایسته‌ین‌لر ده قاییدیرلار، معنالی سوکوت ایچره مستند باشلاییر، یئرلی اهالی و قوْجالار کوْراوْغلو دستانلارینی و اوْنا باغلی اوْلان اوسطوره‌وی اینانج‌لاری دیله گتیریرلر،کیمیسی اؤز تجروبه‌سینی، باشقالاری دا اوْخودوقلاری یا ائشیتدیکلری سؤزلری قولاقلاریمیزا قوْناق ائدیرلر، آنجاق بیر ساپ بؤرکلۆ و جیلیققا گئین بیر قوْجا کیشی یئنی‌دن مستندده گؤرۆنۆر، بۆکۆلمۆش بئلی‌ایله، چلیگی‌نی ساز ائدیب، بیزه کوْراوْغلو جنگی‌لرینی اوْخویور، هر دؤنه چاتلاق بارماقلارینی چلیگین گؤوده‌سینه ساز تئل‌لرینین نییتینه سۆرتدۆیۆنده گؤز یاشلاریم آمان وئرمیر، داها بونا دؤزمک اوْلمور...

آردی وار
@davud_ebdi