🍎🏃📚✏️
68-جى درس
تایلیقلار (10)
4. غير معين تایلیقلار
ج) "نه"سؤزونون اساسيندا دوٌزلنلر: نه ايسه, هئچ نه, هر نه, هابئله حالین اکلرينى قبول ائتميش "نه" سؤزونه "سه" قوشماسى آرتيرماقلا دوٌزلنلر: نه يين سه, نيه سه, نه يى سه, نه ده سه, ندنسه.
بو سوْن تایلیقلاردان بيرينجیلری منسوبیت, حال علامتلرينى آلار, آنجاق ايكينجى دسته اوْنلارين هئچ بيرينى قبول ائتمز.
د. "كس-زاد" سؤزلرينين اساسيندا دوٌزلن غير معين تایلیقلار: هئچ كس, هر كس, بير كس, هر بير كس, هئچ بير كس, هر زاد, هئچ زاد, بير زاد, هر بير زاد, هئچ بير زاد, فيلانكس, ...
بو غير معين تایلیقلارين هاميسى حاللانار, آنجاق "فيلانكس"دن باشقا هئچ بيری جمع علامتى گؤتورمز. چونكى "هئچ" سؤزو يوْخلوق, "بير" سؤزو تكليك و "هر" سؤزو چوخلوق بيلديرير كى, جمعه مغاييردير.
ه. نئچه, بعضى, هامى سؤزلرى واسيطه سيله دوٌزلن غير معين تایلیقلار: نئچه سى, بعضى, بعضيسى, بعضيلرى, هامی, هامیسی.
بو تایلیقلار حاللانار, آنجاق جمع علامتى قبول ائله مز.
69-جو درس
تایلیقلار (11)
4. غير معين تایلیقلار
"هره" تایلیغیندان "هره سى" غير معين تایلیغی ده دوٌزلر, يعنى نيسبت اکينى آرتيرماقلا تزه عوضلیک(ضمیر) يارانار.
تزه تایلیغينين اؤزونه اؤزل خصوصيتلرى وار و شخصه عاييد بير ميقدارين بير نئچه عئينى حيصه يه بؤلوندويونو بيلديرير. چوْخلوق مضمونو داشيديغى اوٌچون نيسبت اکلريندن بيرينجى و ايكينجى شخص تكين علامتلرينى قبول ائده بيلمير, آنجاق جمع علامتلرينى آلار: هره ميز, هره نيز. بو تایلیقلار و "هره" نين اؤزو جمع علامتى قبول ائتمير. اوٌچونجو شخصده ده "سى" اکی آرتیریلار: هره سى.
"هر" اساسيندا دوزلن بو غير معين تایلیقلارین هاميسى حاللانير: هره ميزين, هره سينى, هره نيزده.
هره اساسيندا دوٌزلن بو سوْن تایلیقلار حاللاناندان سوْنرا "كى" اکينى آليب "يييه ليك شخص تایلیغی" كيمى ايشلنر: هره ميزده كى, اوْنلارين هره سينينكى, ...
آنجاق بو تایلیقلار يالنيز يييه ليك و يئرليك حالدا اوْلاركن "كى" اکینی قوْشماق اوْلار.
غير معين تایلیقلارين بعضيلرى منسوبیت اکلرى قبول ائده بيلر: كيمسه ميز, بير كسيم, هئچ بير كسلرى, هر زادين, بعضيلريميز, فيلانكسلر.
آنجاق بو تایلیقلاردان "بير" واسيطه سيله دوٌزلنلر, "نئچه", "هره" سؤزلرى واسیطه سيله يارانانلار, هابئله كيمى, كيميسى, كيم ايسه, نه يى سه, ندنسه, بعضى, بعضيسى, هاميسى, هره سى, ... تایلیقلاری منسوبیت اکلرى قبول ائتمز.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5263
25
- ❤ 1