🍎🏃📚✏️
66-جى درس
تایلیقلار (8)
سوال تایلیقلاری
بو تایلیقلاردان كيم؟ نه؟ هارا؟ هاچان؟ نه واخت... منسوبیت اکلرى ده قبول ائدر: كيميم وار كى؟ نه يين واردير؟ هاراسى واردير؟ هاچانيميز ياخشى اوْلوبدور كى؟ نه واختيندير كى؟
"نئچه؟" سؤزو جمع علامتى قبول ائتمز, حال و منسوبیت علامتلرى آلیب, خبر اوْلار: نئچه نين؟ نئچه يه؟ نئچه نى؟ نئچه ده؟ نئچه دن؟ نئچه دير؟
"نئجه؟" سؤزو جمع علامتى گؤتورمز, منسوبیت اکلريندن يالنيز اوٌچونجو شخص تكى قبول ائدر: بو ايشين نئجه سى يوْخدور كى!. خبر علامتى قبول ائدر: نئجه دير؟
بو عوضلیک نادير حاللاردا حال شكيلچيلرينى آلار: نئجه دن خبر آلما. نئجه نى سوْروشما؟ نئجه دن خبرين وار؟
"هانسى؟" عوضليگى منسوبیت علامتلريندن يالنيز جمعلرى قبول ائدر: هانسيميز؟ هانسينيز؟ هانسيلارى؟
"هاردا= هارادا؟" سوال تایلیغی نه جمع له نر, نه حاللانار, نه ده منسوبيت اکلرينى قبول ائدر, آنجاق اوْ خبر اکلرينى آلا بيلر: اوْنلار هارداديرلار؟ بابكلر, ستارخانلار هارداديرلار؟
سوال تایلیقلارییلا باغلى ميثاللارا باخساز, سوال تایلیغی سسلى ايله قورتارسا و قوْشولان اکی سسلى ايله باشلانسا, ايكى سسليسينى بيرى-بيريندن آييرماق اوٌچون, اوْنلارين آراسينا يا "ن", يا "ى", يا دا "س" حرفى آرتيريلار: هانسينا, نئچه يه؟ هارايا؟ نئچه سى؟
67-جى درس
تایلیقلار (9)
4. غير معين تایلیقلار
غير معين شخصلر و يا شئيلرى بيلديرمك اوٌچون غير معين تایلیقلار ايشلنر:
الف) "كيم" تایلیغینا "ى, يسى, سه, ايسه" اکلرينين بيرينى آرتيريب, يا دا اوْندان اؤنجه "هر, هئچ" كلمه لرينين بیرينى آرتيرماقلا دوٌزلن, غير معين تایلیقلار:
كيمى, كيميسى, كيمسه, كيم ايسه, هر كيم, هئچ كيم.
بو تایلیقلار "كيم ايسه" دن باشقا حاللانار, آنجاق جمعلنمزلر:
كيمينين, كيمينه, كيميسينين, كيميسينه, كيميسيندن, كيمسه نين, كيمسه دن, هر كيمه, هر كيمين, هئچ كيمى, ...
بو تایلیقلاردان "كيمسه, هر كيم, هئچ كين" منسوبیت اکلرينى آلار: كيمسم, كيمسه سى, هر كيميميز, هئچ كيملرى, ...
ب) "بير" سؤزو اساسيندا دوٌزلنلر: بيرى, بيريسى, هر بيرى, هئچ بيرى, هئچ بير, هر بير.
بو تایلیقلاردان"هر بير, هئچ بير"دن باشقا قالانلارى حاللانار, آنجاق جمعلنمزلر.
بو تایلیقلاردان "هر بيرى, هئچ بيرى" منسوبیت اکلرينين يالنيز بيرينجى و ايكينجى شخص جمع و اوٌچونجو شخص علامتلرينى آلار: هر بيريميز, هر بيريز, هئچ بيريميز, هئچ بيريز, هر بيريسى, هئچ بيريسى. بونلار حاللانار و يييه ليك, يئرليكده "كى" قبول ائدر.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5252
29
- ❤ 1