🍎🏃📚✏️
65-جى درس
تایلیقلار (7)
سوال تایلیقلاری
"كيم؟" تایلیغی نين اؤزلليكلرى:
4. كيم سؤزو "هر كس" سؤزونون قاشیلیغیندا ایشله نیر : كيم ايسلاما قارشى چيخارسا ازيله جكدير.
5. "كيم" و "نه" سؤزلرى, يؤنلوك حالدا "هئچ كسه" و "هئچ نه يه" سؤزلرينين معناسيندادير: اؤز اينسانليغينى قيمتلنديرمه ين اينسان كيمه و نه يه لازيمدير؟
"نه" عوضلیينين خصوصيتلرى داها مركب دير. بو اؤزلليكلر بونلاردير:
1. بو سؤز بوٌتون جانلى و جانسيز وارليقلارين آدلارينين يئرينه ايشلنه بيلر: سن نه سن؟ (آدام آدى), سن نيه مينميسن؟ (حئيوان آدى), سن نه آلدين؟ (اشيا)
2. بو سؤز تصديق بيلديرن فعللرله اينكار مضمونو ايفاده ائدر: او نه بيلير؟ اوْنلار نه آنلاييرلار؟ سن بورادا نه گزيرسن؟ حئيوان نه قانير؟
3. نه سؤزو "نئجه" و "هاردان" معناسيندا ايشله نير: سن نه بيله يدين؟ او دوْستونون قاييتديغينى نه بيلدى؟ نه ايشكالين اوْلسا, منه دئيرسن. نه غافيل ايديم!
4. "نه" سؤزو "هر شئى-هر نه" معناسيندا ايشلنر: "نه بيلسن, دانيشما.", " دونيادا نه لر اولمور؟!", "نه گؤرسن, آل."
5. نه سؤزو "هانسى-نئجه" معناسيندا, حئيرت ايفاده ائدير: بير قولاق آس گؤر نه گؤزل شعردير! , نه خيال ايلن اوْلوبسان بئله ادعالى فهله!
6. نه سؤزو "نييه؟" معناسيندا ایشله نیر: آز دانيش, نه آتيليب-دوٌشورسن؟! , نه سوْخولورسان آرايا, باشى بلالى فهله؟
7. نه سؤزو چيخيشليق حالدا "نييه؟" سوالينين يئرينه ايشله نير: ندن بو حالا دوشموسن؟ , ندن حقينى ايسته ميرسن؟
8. نه سؤزو "وار" سؤزو ايله "هئچ نه" و "هئچ زاد" سؤزلرينين عوضينده ايشلنير: ائوده نه وار؟ , گئتميرم, باغدا نه وار؟ , بو كيتابدا نه واركى؟
9. نه سؤزو "يوخ" سؤزيله ايشلننده " هر شئى" معناسى وئرير: اوْنون سينه سينده نه لر يوْخدوركى؟! , موزه لرده نه لر يوخدوركى؟!
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5244
29
- ❤ 1