#book
#kitob
"Talaba"ni
tugatganim haqidagi postni ko‘rgan bir tanishim o‘ta motivatsion asar emasmikan, ishqilib deb so‘rab qoldi. Aslida kitobning nomidan o‘zim ham biror muvaffaqiyatga erishib qo‘ygan odamning mehnatkashligini maqtab o‘zingni aybdor, ishyoqmas-dangasa his qildiradigan asarlardan biri bo‘lsa kerak deb o‘ylagandim. Biroq o‘qishni boshlagach xato o‘ylaganimni tushundim.
Tara Vestover maktab ta’limini ko‘rmagan, mormonlar jamiyati vakili bo‘lishiga qaramay universitet talabasi bo‘ladi, magistraturani Kembridjda o‘qiydi va doktorlik dissertatsiyasini yoqlaydi. Ma’lumot o‘rnida mormonlar zamonaviy jamiyatlar qulab, oxirzamon kelishiga, Isoning qaytishiga ishonadigan va bunga pul, qurol-yarog‘ va oziq-ovqat g‘amlab tayyorlanadigan, zamonaviy dunyo qulayliklarini rad etadigan, maktab ta’limi va tibbiyotdan foydalanmaydigan kishilardir.
Kitob nomini va Taraning muvaffaqiyati haqidagi bu qisqa ma’lumotni eshitgan har bir kishi asarni qahramonning qanday qilib shunday konservativ jamiyatdan chiqib ketolgani, qanday qiyinchiliklarni ko‘rib o‘qigani, ilm yo‘lida nimalar qilgani haqida deb o‘ylashi tabiiy. Lekin uni o‘qiganingiz sari aslida bu narsalar haqida emasligiga guvoh bo‘lasiz.
Voqealarni bayon qilar ekan, Tara hatto bakalavrda o‘qib yurgan kezlarida ham otasining qarashlarini eng to‘g‘ri yo‘l deb hisoblagani, zamonaviy dunyoqarash bilan yashaydigan dugonalarini shaytonning vakillari deb hisoblaganini yozadi. Asarda u qancha ko‘p dars qilgani, qanday qiyinchiliklarga duch kelganiga deyarli to‘xtalmaydi. U asosan o‘zi va ota-onasi, akasi Shon va opasi Odri o‘rtasidagi munosabatlar, akasi tomonidan unga yetkazilgan jismoniy va ruhiy jarohatlar, ota-onasining unga ishonmasligi, va ishonchsizlik ortidan qanday qilib shaxsiyati ikkiga ajralgani haqida yozadi.
G‘ishtin devorli Kembrijning talabasi bo‘lgan bu qiz doimo o‘zini zamonaviy dunyoga munosib emasdek his qiladi, ichidagi bir qiz haliyam konservativ, xunuk va didsiz mormon qizi bo‘lib qolaveradi, qaror qabul qilishga kelganda doim shu ikki shaxsiyat orasida kurash ketadi. U oilasini birlashtirishga, ota-onasining ishonchini qozonishga, akasini to‘g‘ri yo‘lga solishga ko‘p harakat qiladi. harakati besamar ketgan paytlarda esa o‘zi yashayotgan yangi dunyoning vakili bo‘lishga, oilasining ta’siridan chiqib ketishga urinadi va alaloqibat u buni uddalaydi. Tara doktorlik dissertatsiyasini qila olgani uchun "talaba" emasdi, o‘z o‘tmishidan qochib qutula olgani, o‘sha ikki shaxsiyatdan birini yenga olgani uchun ham "talaba" edi.
Muallif asarni shunday yakunlaydi: "Siz bu o‘zgarishni istagancha atashingiz mumkin. Transformatsiya, Metamorfoza, Soxtalik, Xiyonat. men esa buni ta’lim deb atayman."
©️ Maftuna Aliyeva
