Першы студэнцкі масавы пратэст у незалежнай Беларусі

14 кастрыніка 1994 года ў Менску прайшла масавая акцыя студэнтаў пад лозунгамі “Дзякуй прэзідэнту за хлеб і малако” і "Малако і хлеб — студэнцкі абед". Так студэнты адзначылі 100 дзён праўлення нядаўна абранага прэзідэнта Лукашэнкі. Яны спрабавалі давесці яму і ўраду, што жыць на стыпендыю у 2-3 долары ў месяц немагчыма. Акцыя мела вялікі поспех. У БДУ стыпендыя неўзабаве вырасла амаль да 20 долараў, пры сярэдніх заробках у 60 долараў. Саміх удзельнікаў акцыі тады ніхто не затрымліваў.

Сярод арганізатараў акцыі былі анархісты і прадстаўнікі Задзіночання Беларускіх Студэнтаў. ЗБС паўстала напрыканцы 1980-х, яно займаліся абаронай правоў студэнтаў, прасоўваннем «беларускасці» ў сістэму вышэйшай адукацыі, а таксама ўдзельнічала ў шэрагу палітычных кампаній. Для многіх маладзёнаў арганізацыя як і студэнцкі рух сталі школай грамадзянскага актывізму і трамплінам у палітыку.