Кредит картаси нима ва ундан қандай фойдаланиш керак?

Аввалги постимизда банклар таклиф қилаётган кредит карталарини бир жойга жамлаб, уларнинг айрим шартлари ҳақида маълумот бергандик.

Шундан сўнг кўплаб обуначиларимиз кредит карта ўзи нима экани ва ундан қандай фойдаланиш мумкинлиги ҳақида ҳам пост ёзишимизни сўрашди.

Шу сабабли улар ҳақида қисқача маълумот беришга қарор қилдик.

Кредит карта ўзи нима?

Кредит карта — банк томонидан белгиланган лимит доирасида қарз маблағидан фойдаланиш имконини берувчи карта.

Унинг оддий истеъмол кредитларидан асосий фарқи шундаки, унда имтиёзли давр мавжуд.

Бу давр ичида картадан фойдаланилган маблағ белгиланган муддатда қайтарилса, фоиз ҳисобланмайди.

Акс ҳолда, фоиз ҳисобланади ва улар айрим ҳолларда микроқарзлардан ҳам юқори бўлиши мумкин. Фоизлар банк шартларига кўра турлича бўлади.

Кредит картани қандай очиш мумкин?

Кредит картани расмийлаштиришдан аввал биринчи навбатда банкдан кредит лимити олиш талаб этилади. Лимит барчага ҳам ажратилмайди.

Кредит тарихи салбий бўлган ёки карта айланмаси яхши бўлмаган мижозларга лимит берилмаслиги мумкин.

Масалан, 5 млн сўм лимит ажратилса, мижоз шу миқдордан фойдаланиши мумкин. Қарзни ўз вақтида қайтариш ва бошқа ижобий омиллар ҳисобга олиниб, банк кейинчалик лимитни ошириб боради.

Фойдаланишда нималарга эътибор бериш керак?

Кредит картадан фойдаланишда биринчи навбатда имтиёзли даврга эътибор бериш керак. Одатда бу давр 45 кундан 62 кунгача бўлади.

Шу муддат ичида картадан фойдаланиб, ундан олинган маблағ қайтарилганда, фоиз ҳисобланмайди.

Белгиланган муддатда фойдаланилган маблағ қайтарилмаган тақдирда, унга фоиз ҳисоблана бошлайди. Баъзи банкларда бу ставка 70 фоиздан ҳам ошиши мумкин.

Бу ерда эътибор бериш керак бўлган энг муҳим жиҳат шуки, имтиёзли давр фақат товар ва хизматлар учун тўлов қилинганда амал қилади.

Картадан нақд пул ечиш ёки бошқа картага пул ўтказиш каби амалиётлар имтиёзли даврга кирмайди. Бундай ҳолатларда дарҳол фоиз ундирилади ёки картадан пул ечиб олиниши мумкин.

Хулоса

Банкларнинг кредит карта маҳсулоти имтиёзли давр ичида товар ва хизматлар учун фойдаланилса ва белгиланган муддатда қайтарилса, фойдали ҳисобланади.

Акс ҳолда, имтиёзли давр тугагач, юқори фоиз ставкалари қўлланилишини инобатга олиш лозим.

Шу сабабли кредит карта очишга қарор қилишдан олдин унинг барча шартлари билан танишиб чиқиш тавсия этилади.

Айрим банкларда бу ставкалар юқори бўлса, айримларида паст бўлиши мумкин.

@bankir