Кичә, 7 августта Казанда Камал театры бинасы янында мәрхүм җырчы Зуля (Зөлфия) Камалова иҗатына багышланган концерт узды.

"Yummy music" продюсерлык үзәге җырчылары Камалова җырларын яңгыратты.

"Зөлфия ханым татар музыкасын дөнья күләмендә танытты, аның белән кыю экспериментлар ясарга, аны заманча һәм актуаль яңгыратырга мөмкин икәнен күрсәтте", дип белдерде продюсерлык үзәгенең матбугат хезмәте.

Камалованың җырларын Сәйдә Мөхәммәтҗанова, ILGIZ (Ильгиз Шайхразиев), Дышать (Гөлназ Шакирова), Elina (Элина Ситдыйкова), Al Su (Алсу Мансурова), Рәдиф Кашапов, Булат Шәйми башкарды.

Бу кичә Зөлфия Камалова иҗатына багышланган чаралар сериясенең бер өлеше булды.

Зуля Камаловага, исән булса, бүген 57 яшь тулыр иде. Ул 2024 елда яман шешне җиңә алмый, вафат булды. Ире һәм кызы белән Австралиядә яши иде.


Чарадан бер күренеш "Юк-бар" телеграм каналында.