“Үз телем” бәйгесе җиңүчеләре билгеле

Казан мэриясе хәбәр итүенчә, ,быел Русиядә Халыклар бердәмлеге елы уңаеннан бәйгедә татар проектлары гына түгел, Татарстанда яшәүче Идел буе халыкларының туган телләре һәм мәдәниятенә багышланган идеяләрнең авторлары да катнашкан. Нәтиҗәдә 12 җиңүче билгеләнгән.
 
Татарлардан Фаил Баязитов (юмор аркылы татар әдәбиятын танытучы «Әрсез әдәбият» проекты), Нурислам Денисов («Сөйлә татар» веб-платформасы), Ихтыяр Кыямов (танылган татар шәхесләре турында роликлар), Айдар Ниязов (музыкаль лекцияләр), Альбина Ногманова («Җиде кыз» пластик спектакле), Тимур Сәлимов (татар телен өйрәнү өчен ясалма фәһем платформасы), Баязит Хәсәнов («Телем» мобиль кушымтасы), Булат Шәйми (акустик кичәләр) җиңгән.

Идел буе халыкларына багышланганнары арасыннан дүрт проект җиңгән. Аларның авторлары: Александра Исаева (мари телендә борынгы җырларны яздыру), Евгений Сергеев (Казанның берничә тукталышын Идел буе халыкларының мәдәнияте һәм теленә багышлап бизәү), Максим Кузнецов (удмурт теленә өйрәтүче видеороликлар төшерү) һәм «Zakaria» фолк төркеме (Идел буе халыклары телендә «Бердәм» музыкаль җыентыгын яздыру).

Барлык проектлар да ел азагына кадәр гамәлгә ашырылырга тиеш. Аларны киләсе ел башында киң җәмәгатьчелеккә тәкъдим итәчәкләр.

«Быел безнең өчен мөһим ел – бәйгегә 5 ел. Аның үз тарихы, үз багажы бар. Иң куандырганы – елдан-ел артабыз. Безгә яшьләр карашы кирәк, яшьләр телне, мәдәниятне ничек тоя, нинди кызыксындыру юлларын тәкъдим итә ала, заманча нинди ысуллар куллана? Шәхсән минем өчен барлык финалистлар да инде җиңүчеләр, һәр проект тормышка ашарга лаек», дигән Казан шәһәре мэры урынбасары Гүзәл Сәгыйтова.

▪️Быел барлыгы 80гә якын гариза бирелгән булган, шулар арасында 23е финалга чыккан.

@azatliqradiosi