Уа шьжьыбзиа, ааԥынра, март мза ԥшьба,
С-Аԥсынра мратәылаха, ааԥынра азырба!
О, рразҟы мҩа дуӡӡаха, Аԥсны аԥацәа
Рхаҵара ашәа ухыҩуа, игоит игәырӷьаҵәа!

(Алықьса Џьонуа)

Иахьа акрызҵазкуа ҭоурыхтә мшуп ҳаԥсадгьыл азы.

Абри аҽны 1921 шықәсазы Аԥсны аҳҭнықалақь Аҟәа асовет мчра шьақәгылеит. Кьаразаа ԥшьышықәса иззықәԥоз ари аиааира ажәлар гәырӷьа хҭысны ирыдыркылеит, избанзар ақырҭуа меншевикцәа даара аԥхасҭа ду шҳарҭоз еилкаан.

Асовет мчра ааира ҳара ҳзы раԥхьаӡа иргыланы изхадароу, 1864 шықәсазы иаԥыхыз аԥсуа ҳәынҭқарра ахьеиҭашьақәыргылахаз азоуп. Аԥсны зхы иақәиҭу, ихьыԥшым республиканы ирылаҳәан, Ленин ари ақьаад инапы аҵаиҩит.

Рыцҳарас иҟалаз, мызки-бжаки мҵыцкәа Сталин ҩаԥхьа ақырҭқәа ҳрыдларатәы аусқәа реиҵарҟәаҟәара далагеит, игәахәтәы наӡеит 1931 шықәсазы. Аха уи ажәашықәса иалыршазгьы маҷым: акьыԥхь, алитература, аҭҵаара реизҳара иатәын, Аҟәа аинститут аатит, апатриотцәа усгьы иҳагмызт, аҵара бзиа змаз ауаажәларра еиҵагылеит, Аԥсны ахатә Конституциа аднакылеит (1925 ш.).

Ишдыру еиԥш, асовет аамҭа аҟазшьа бааԥсқәагьы ацын, аха Нестор Лакәаба иахьынӡауаз ҭауади-аамсҭеи, аинтеллигенциеи иркьымсратәы дныҟәон, дрыхӡыӡаауан, ҳара акулакцәа ҳамаӡам ҳәа ихырҵәагаз Москваа рыдҵақәа наигӡомызт, иԥсы ахьынӡаҭаз ижәлар рзы абзиа дашьҭан.

🧡 Ахьыуардын шәақәтәа