Ашәышықәсақәа иргәылсны иаауа Аԥсны аҭоурых зегьы шьала ианҵоуп. Абри аҭоурых иԥымҵәо цәаҳәа ҟаԥшьны ҳхаҿы иааҳгозар, XIX ашәышықәсаҿы ианааи уи ацәаҳәа зынӡа ихагаханы, еибах-еибафо рҩашхеит, ирҩаԥшьхеит. Убасҟак ирацәоуп усҟан ахақәиҭразы икаҭәаз ашьа.

160 шықәса раԥхьа абри аҽны еилгеит Кавказ ауразоуроу амцашыра иҭазыргылаз аибашьра, еилгеит аԥсуа идгьыл аҿы — Аҳҷыԥсы агәеисырҭа Гәбаадәы. Аурыс саиааит ҳәа аниԥхьаӡа ампыҵахалара ианымшәаз аубыхцәеи аԥсуа-ашьхарыуааи рықәцара ашьҭахь ауп. Амчқәа хыԥхьаӡарала ишузеидымкылаӡозгьы, абџьарла дырмыхәеит, ақыҭақәа былтәхеит. Ус ҟаҵатәхеит избанзар, ар еилыршьаагьы ԥсыуа хаҵак ишәақьмца акыраамҭа ԥсҭак ахьчар алшон. Иаҳгәалаҳаршәап аҭоурыхтә-фырхаҵаратә ашәақәа. Аԥсра иацәымшәоз ахацәа рыԥсадгьыл иазықәԥон, рыжәлар еиқәдырхар рҭахын, раԥсуара цқьаны, кьыс амаӡамкәа.

Ари аибашьра иалҵшәахаз ахҵәара амшала кьоу зҳәо даанымхеит Саӡын, Ԥсҳәы, Аибӷа, Аҳҷыԥсы, Дал-Ҵабал. Зқьышықәсала зылҩаҵә ҩеиуаз, ахьхьаҳәа збызшәа зҿаз ажәлар-гәыԥқәа ишҳәыԥкыз ршьамдгьыл ианыҵит. Аԥсны ахаҿра наунагӡа еиҭакхеит, уа зынӡа ажәҩан иаҵакьысуаз аԥсшәа амҵәыжәҩақәа ҿырҟәдаан! Егьа аамҭа царгьы еинылашьа змам ааха, иҿымцәаауа ахьаа.

Игәыҭшьаагоу арҭ ахҭысқәа зыхҟьаз инҭырҳәцааны адырра ҳуалуп, агәалашәара — иҳалшо иреиҵоуп. Зхы лазмырҟәыз ҳашьцәа ргәамчи рфырхаҵареи кьаҭара ақәымзааит!

🧡 Ахьыуардын шәақәтәа