جعفر پورقاسم

سئویرم اورَکدن دوغما ائلیمی


سئویرم اورَکدن دوغما ائلیمی
سونرا اؤز آنامی، آنا دیلیمی

نه قَدَر سئویرم اوبانی، ائلی
او قَدَر سئویرم بو شیرین دیلی

گتیریبدی منی آنام دونیایا
بنزه‌دیب اولدوزا ، بنزدیب آیا

بوتون گؤزللییی بنزدیب منه
اؤیونوب اوغلونا او دؤنه-دؤنه

کؤنلومو اوخشاییب اینجه سسی ایله
شیرین تورکوسو ایله، خوش نفسی ایله

گؤز آچیب گؤرموشم آنا سئوگی‌سین
آنا محببتین، آنا قایغی‌سین

قورویوبدو منی قادا، َبلادان
اؤنملی سانماییب کیمی بالادان

هئچ کیمسه توتانماز آنانین یئرین
آنانین سئوگیسی، قایغیسی درین

گاهدان بیر یاراماز، قدیر بیلمَه‌ین
اوره‌یی قارا داش، اوزو گولمه‌ین

آتیر، آناسین دا، آنا دیلین ده
دانیر وارلیغین دا، دوغما ائلین ده

چیخمامیش نئچه آی ائلدن اوزاغا
اؤز آنا دیلینی قویور قیراغا

ای !!! اؤزگه دیللری اوستون بیلنلر
اؤز آنا دیلینه آجی گولن‌لر

واحیدین غزلی یئتمه‌دی سیزه ؟!
فضولی‌نین شعیری چاتمادی سیزه

دوشوندوز نسیمی بابامین سؤزون
ایزله‌دیز بابکین دوروملو ایزین

[ اوخودوز بوز آتی هئچ آت کئچمه دی(گئشمه دی )
نبی‌نین پاپاغی دئشمه - دئشمه‌دی

قوی سنه دئسینلر آی قاچاق نبی
هَجری اؤزوندن آی قوچاق نبی  ]

قیر آتی گؤردوز مو؟ چنلی بئلده سیز
کوراوغلو مئیداندا چؤکورمه‌دی دیز

هئچ ناغیل دئدی می‌؟ بؤیوک بابانیز
سارا حئکایه‌سین ، حیالی بیر قیز

توخونماسین بوهتان بیزیم ائللره
اؤزونو قورودو آتدی سئللره

یاشاتدی اؤزو ایله آرپا چایینی
یئتیرمز زمانه اونون تایی‌نی

سئوگی عالمینده یاشیر، خان چوبان
محببت یولوندا وئرَن جان چوبان

نییه اینانمیرسیز اؤز وارلیغیزا !
قویورسوز دوشمنلر سیزه گور قازا

بیزیم اجدادیمیز یاشاییب بوردا
تورکو آد قویوبلار اؤلکه‌یه، یوردا

دوشونن هئچ اینسان حددینی آشماز
کؤچری عونوانی بیزه یاراشماز

دئمیرم عاییب دیر باشقا دیل بیلمک
آیری-آیری دیلده دانیشیب، گولمک

عاییب‌دیر توتاسان یادلارین اَلین
گودوب، قورویاسان اونلارین دیلین

یوز دیلی اؤيره‌نیب، یوز دیلده دانیش
آنجاق اؤز دیلینه گؤستر آنلاییش

آنلا اؤز دیلینده، قان اؤز دیلینده
پروانه اولساندا، یان اؤز دیلینده

بو دیلده واقیف‌لر قوشمالار قوشوب
بو دیل باشقا-باشقا اؤلکه‌لر آشیب

بو دیلده وورولوب اصلییه، کَرم
لئیلی‌نی بو دیلده سئویب ایسته‌رم

نباتی بو دیلده یارادیب غزل
شهریار بو دیلده دانیشار گؤزل

خاقانی ، نیظامی، ساهیر، ناتوان
بو دیلده اولوبلار یازیب، یارادان

موشفیق ده بو دیلده دولانیب باغی
ایلیشیب سئوگییه اونون اَیاغی

دیل خزینه‌میز ده نه‌لر وار، نه‌لر !
قوشمالار، ناغیل‌لار ، اوغوز نامه‌لر

بیزه اؤیود وئریب دده میز قورقود
لوغت نامه یازیب کاشغرلی ماحمود

بو دیلده سؤیله‌نیب آرزو، دیلک‌لر
بو دیلده یازیلیب قوتلو بیلیک‌لر( قوتاد غوبیلیک)

بیر باشی اورومچو، بیر باشی اؤزبک
یورولار ساناسام ائشیدن تک-تک

بیر قولو گؤی خزر بیری آغ دنیز
گؤزو باکی، شیروان ، اوره‌یی تبریز

آیدین گله‌جکدن وئریرم خبر
گونش نور ساچاق بیزه برابر

آرزو بوداغیندا حسرت گوللری
آچیب، اوخشایاجاق بیزیم ائللری

  ۱۲  ،  ۴  ،  ۱۴۰۵

https://t.me/Adabiyyatsevanlar