🔯 Beynəlxalq Münasibətlərin Təhlili Mərkəzinin Qərb Araşdırmaları Departamentinin rəhbəri Vasif Hüseynov İsrailin i24NEWS telekanalına açıqlamasında: “Türkiyə ilə qardaş və müttəfiqik, Türkiyə sosial şəbəkələrindəki reaksiyalar münasibətlərimizə təsir etməyəcək”

– Mövzunu daha ətraflı müzakirə etmək üçün hazırda bizə Beynəlxalq Münasibətlərin Təhlili Mərkəzinin Qərb Araşdırmaları Departamentinin rəhbəri, doktor Vasif Hüseynov qoşulur. Vasif bəy, sizi “i24NEWS” kanalında görməyimizə şadıq. Azərbaycan özünü multikulturalizm nümunəsi kimi təqdim edir. Bəs məktəblərdə geyimlə bağlı bu məhdudiyyətlər həmin imiclə necə uzlaşır?

– Bəli, girişdə də qeyd etdiyiniz kimi, məktəblərdəki məhdudiyyətlər hər hansı konkret dinə qarşı yönəlməyib. Bu, ölkənin çox qədim və xalqımız üçün olduqca əhəmiyyətli olan dünyəvi ənənələri ilə bağlıdır.

Məktəbli formaları ilə bağlı qaydalara edilən yeni dəyişikliklər vahid geyim qaydalarını və təhsilin dünyəvi əsaslarını poza biləcək istənilən geyim növünə müəyyən məhdudiyyətlər gətirib.

Əslində, bu, ölkənin ümumi multikulturalizm ənənələrinə də uyğundur. Çünki məqsəd konkret bir dini hədəfə almaq deyil, bütün insanlar üçün neytral təhsil mühiti yaratmaqdır.

Bu mühitdə müxtəlif dinlərin və etnik qrupların nümayəndələri özlərini başqaları ilə bərabər səviyyədə hiss edə və diqqətlərini üzərlərində daşıdıqları dini atributlara və konkret dini mənsubiyyətlərinə deyil, təhsillərinə yönəldə bilərlər.

– Bakıda müşahidə etdiklərinizə əsasən, bu qaydalara qarşı etirazlar nə dərəcədə geniş yayılıb? Sizcə, hökumət müəyyən güzəştlərə gedəcək, yoxsa qaydaların tətbiqində qətiyyətli mövqeyini qoruyacaq?

– Əslində, ölkə daxilindən daha çox xaricdən reaksiyaların gəlməsi bizi təəccübləndirdi.

Azərbaycanda dünyəvi ənənələr çox qədimdir. Paytaxtın mərkəzində hələ 1960-cı illərdə Bakının mərkəzi hissəsində ucaldılmış, baş örtüyünü çıxaran qadını təsvir edən abidəni görə bilərsiniz. Həmin abidə ölkənin dünyəvi ənənələrini simvolizə edirdi.

Bu da göstərir ki, söhbət indiki hökumətin gətirdiyi yeni bir yanaşmadan getmir. Bu ənənələrin kökləri çox qədimə dayanır.

Azərbaycan 1918-ci ildə ilk respublikasını qurarkən bütün müsəlman dünyasında qadınlara seçki hüququ verən ilk ölkə oldu. Hətta bu, bir çox Avropa ölkəsindən xeyli əvvəl baş verdi.

Eyni zamanda, qadınların ictimai həyatda, təhsildə, iş yerlərində və digər sahələrdə gender bərabərliyi təmin edildi.

Məhz buna görə də təhsil qaydalarına edilən son dəyişikliklər əhalinin əksəriyyəti tərəfindən dəstəkləndi.

Etiraz edənlərin sayı çox az idi və təəssüf ki, onların bəziləri xarici qüvvələr tərəfindən dəstəklənirdi və hələ də dəstəklənir.

– Elə bu məsələni müzakirə edək. Çünki Azərbaycanın yaxın müttəfiqi olan Türkiyədə də bu məhdudiyyətlərə qarşı etirazların şahidi olmuşuq. Hazırda bu məsələ ilə əlaqədar Türkiyə ilə Azərbaycan arasında nə baş verir?

– Bəli, təəssüf ki, Türkiyədə Azərbaycandakından daha çox reaksiya oldu.

Türkiyədə bəzi radikal dini qruplar var ki, onlar təkcə Türkiyədə deyil, ətraf ölkələrdə də İslamla bağlı baş verən istənilən məsələyə olduqca həssas yanaşırlar.

Daxili işlərimizə bu cür müdaxilə Azərbaycan xalqı tərəfindən müsbət qarşılanmadı.

Amma siyasi səviyyədə vəziyyət tamamilə normaldır. Türkiyə hökuməti ilə qarşılıqlı anlaşmamız var. Biz qardaşıq, müttəfiqik.

Düşünmürəm ki, hazırda Türkiyə sosial şəbəkələrində müşahidə etdiyimiz vəziyyət iki ölkə arasındakı münasibətlərə hər hansı təsir göstərəcək.