ئاشنایی چەنی :
دەگاو پەریانی جە محاڵوو دینەوروو سەحنەو کرماشانینە :

دەگاو پەریانی کەماچا وەروو زەریفیش نامێش نریەینە پەریان ، هامساو نزیکوو کەنوولەینە ،
ئی دەگەی 50 یانێنە و 217 کەسێش چەنە ژیوا ،

پەریانیێ باوەڕشا پاسنە کە جە ڕەگەزەو فەراۮی هەجیجینێ ، پاسە دیارا فەراۮ یۆ جە ئەوڵاۮا فەقی ئەحمەۮی کوڕوو شێخ مسەفاو تەختەی عالموو نامۮاروو کوردەسانی بۆ ٠

پەریان بنێ تفی گەورێش چەنەنە کە پەریانیێ باوەڕشا پاسەنە دەس نەمامەو فەراۮینە ٠

دەگاو شەریف ئاوایچ کە نزیکتەرین هامساو کەنوولەینە و پێسەو کەنوولەی و پەریانی بە هۆرامی قسێ کەرا 55 یانێنە و 226 کەسێش چەنە ژیوا ،

ئی دەگەی هەر جە کەنوولەی جیەی بیێنەوە و دارا و حەمامێوە کۆنەی تارێخین ،

شێڵانێ و ساوی و مرۆ و وەزی و هەڵووچێ ، 20 جۆرێ هەنگووری سەمەروو ئی یەرە دەگا هۆرامی زوانینە ٠

بێژ جە باخداری ئی یەرە دەگا خەڵکەکەشا خجڵوو حێوانداری و قاڵی کەردەی و هەنگداری و خەلە و خەرمانینێ ٠

فرەیوە جە خەڵکوو ئی یەرە دەگایا داراو سەوادی دانشگایی و عیلمینێ ، ئەغڵەبشا شۆرەتشا ئەمیریا ٠
دەگایاو کەنوولەی و شەریف ئاوای و پەریانی