🔴 وەختارێ :
جوانی نمەمەنۆ ، تازه یاوینە خوۮا چه گیاندارێ سەمەرەش بەنامێ ((بنیاۮەمی پیری )) وەش کەردەن، سەمەرەیوە کە گێڵۆ شۆنەو عەینەکەکاشەرە ، جە حاڵێنە ئینەی چەمێشەو ، وەێلانا شۆنە موبایلەکەیشەرە جە حاڵێنە چراوە هەرئاموبایلیشە ڕۆشنە کەردێنە هەتا بێزۆشەو!
ڕۆی وێش کەرۆ ئاشپەزخانەرە پەنج دەقێقێ واق بۆ یخچاڵەکێرە و ماقووڵانە مزیۆرە ٠٠٠
ئیتر گەرەکت نیا دنیەی فاڕی ، چون وەنەت حاڵی بیەن دنیا مەیلوو هام کاریش نیا ،
ئیسە تەنیا دۆعەی کەری هەتا عانێ وتەنی دنیا بێ تەق و پۆق و شێنەی گێڵۆ و وەختارێ هایت بیەو مازیت پێسەو لەولاوەو بەرەو هەماری جێڕەش نەی!
جوانێ بێنمێ ، گەزێ کەرێنمێ لاقۆرێوە ئیسە ئەر کونترۆڵوو تەلەفزیۆنەکەی چەولاو یانەکەیەو بۆ ئەوەڵ لەیەکش مۮیمێوە زانمێ پانەی مێژۆ هۆر بێزمێوە یام نا !
زەمانێ پەی فیزی ژل دێنمێ وەنەو قژاما و سێشوارش کێشێنمێ ئیسە پەی هۆرئێستەی یاگێ وێمانە ژێلوو ئێشیما گەرەکا!
ئازەمانە خەموو چەرمە بیەی قژاما بێ ، ئیسە دڵ وەشیما ئانەن ئاچن تاڵە موە چەرمەیچە هەڵای نەڕێزەینێ !
زەنگۆڵێما پیەی وێشانێ گۆشما مەۮارانە، وەڵێ ئانەینە هەوا شناسی واچۆ واران وارۆ زەنگۆڵی چەپ ئاگاۮاری نامە بەرکەرۆ و زەگۆڵی ڕاسیچ ددانش پۆرە منیۆ !
جوانێ بێنمێ گلێرێنمێ زوو هۆرزێنمێوە هەتا یۆ نەوینۆما ٠ئیسە ئەر گلێرمێ ئەوەڵ چن دەقێقێ یاگێ وێمانە نمەجمێ هەتا هەناسەیوەما ملۆوە پۆرە و چەودما لەیەکش مۮەیمێوە بەرمارۆ هۆرزبێزمێوە یام نا !
ئەوسا شەوانێ هەتا دوێ شەوێ هایما بێ٠ ئیسە ئەر سەعات دە کەسێۆ زنگ دۆ وەروو وێمارە ماچمێ : ((خوۮا بەخاسش گێڵنۆ ڕەنگا یاگێ ئایێرش گێرتەبۆ پێ ناوەختەنە زەنگش دان؟))
زەمانێ بێ خوۮا خوۮاما بێ پەنج شەممەو جمعە بۆ ئیسە عاشقوو ڕوێوەنمێ کە هیچ دۆکتۆر و ئازمایشگە و قەبزێوە کارەنە نەبۆ ! دەوا و دەرمان بیەن بە بەرنامە واردەیما : وەڵێ وەردڵی ، دماو وەردڵی ، وەڵێ نەهاری ، دماو نەهاری ،شەوێ وەڵێ وتەی ٠٠٠
کسمما بیەن دەرمان واردەی ، بازەجارێ بەشەر شێوێش وەنە نان واردەی پەێ عەزموو قورسان یام قورسی پەی عەزم واردەینێ ؟
ویروو هۆشیچ هەر قشێش مەکەرە !
نامێ هام کەلاسیەکا کەلاس ئەوەڵیت ویرێنێ ، وەلێم پەی ئینەیە بلی دلێ ئۆتاقی مشیوو بلی و ئەزنەو بەی جبەر هەتا گنۆە ویرت چی ئامانی!
بازە وەختێ بەڵایێرێ گێڵی شۆنەو کرێڵیرە کە ئاخرش وینی ئینا بەرەکەوە ، ئاننۮە گێڵی پەی تەلەفوونەکەیت کە یۆ زەنگت مۮۆ پەی و تازە زانی کیسەتنە بیەن!
پی گردە دەردیسەراوە هەڵای بەشەر هەر ژیوایش لاوە وەشارێ ٠
ڕاسی پەرسای عەیب نیا شمە نمەزاندێ خیاڵما چێش کەروو؟
@VANADIHOWRAMAN
Post #4444
2.79K
- 😢 8
- ❤ 5
- 👍 3
- 👏 2