✅ 2026-yil 12-oktabr kuni O‘zbekiston Respublikasi Texnik jihatdan tartibga solish agentligida ISO/IEC JTC 1/SC 32/WG 3 "Ma’lumotlar bazasi tillari" xalqaro ishchi guruhining yig‘ilishi o‘z ishini boshladi. Mazkur xalqaro tadbir O‘zbekiston texnik jihatdan tartibga solish agentligi huzuridagi Standartlar instituti hamkorligida tashkil etilmoqda.
Yig‘ilish doirasida ma’lumotlar bazasi tillari sohasidagi xalqaro standartlarni ishlab chiqish, takomillashtirish va qo‘llab-quvvatlash, shuningdek, raqamli texnologiyalarning jadal rivojlanishi bilan bog‘liq dolzarb masalalar muhokama qilinmoqda.
✅ Tadbirda AQSh, Germaniya, Janubiy Koreya, Italiya, Niderlandiya, Shveytsariya va boshqa mamlakatlardan xalqaro ekspertlar ishtirok etmoqda. Mutaxassislar o‘rtasidagi fikr va tajriba almashinuvi ma’lumotlar bazasi tillari sohasidagi ilg‘or yondashuvlarni o‘rganish, xalqaro standartlarni yanada takomillashtirish hamda sohadagi xalqaro hamkorlikni mustahkamlash uchun muhim ahamiyat kasb etadi.
✅Xalqaro standartlashtirish tashkiloti (ISO) va Xalqaro elektrotexnika komissiyasi (IEC)ning ISO/IEC JTC 1/SC 32 «Ma’lumotlarni boshqarish va almashish» quyi qo‘mitasi doirasida bugungi kunga qadar 130 ta xalqaro standart nashr etilgan bo‘lib, yana 32 ta standartni ishlab chiqish ishlari davom etmoqda. Ushbu standartlar axborot tizimlari o‘rtasidagi o‘zaro muvofiqlikni ta’minlash, ma’lumotlarni saqlash, qayta ishlash va almashish jarayonlarini takomillashtirishda muhim o‘rin tutadi.
O‘zbekistonda raqamli iqtisodiyotni rivojlantirish, axborot texnologiyalari sohasida eksport salohiyatini oshirish va xalqaro hamkorlikni kengaytirishga alohida e’tibor qaratilmoqda. 2025-yil yakunlariga ko‘ra, mamlakatda IT-xizmatlari eksporti hajmi 940 million AQSh dollarini tashkil etdi. Bu esa zamonaviy axborot texnologiyalarini joriy etish, ilg‘or xalqaro tajribalarni o‘zlashtirish va xalqaro standartlarni milliy amaliyotga tatbiq etishning dolzarbligini yanada oshiradi.
✅Mazkur xalqaro yig‘ilish raqamli iqtisodiyotni rivojlantirish, ma’lumotlar bilan ishlash samaradorligini oshirish va axborot tizimlari o‘rtasidagi integratsiyani mustahkamlashga qaratilgan muhim muloqot maydoni hisoblanadi. Shuningdek, u O‘zbekistonning xalqaro standartlashtirish jarayonlaridagi faol ishtirokini kengaytirish, milliy tajribani xalqaro miqyosda namoyon etish hamda soha rivojiga qaratilgan hamkorlikni yangi bosqichga olib chiqishga xizmat qiladi.
🌐 standart.uz | 😎 Facebook | 😎Instagram | 😎YouTube