Hikaru Nakamura Javohir Sindarovga maslahat berayotganini hazil bilan izohladi

Amerikalik taniqli shaxmatchi Hikaru Nakamura va o‘zbekistonlik grossmeyster Javohir Sindarovning Kiprda bir mehmonxonada istiqomat qilayotgani muxlislar orasida muhokamalarga sabab bo‘ldi.

Ayrim muxlislar Nakamura Sindarovning tayyorgarlik jamoasiga qo‘shilgan bo‘lishi mumkinligini taxmin qilishdi.

Biroq amerikalik grossmeyster bu fikrlarga hazil bilan javob qaytardi.

"Men uning jamoasida emasman. Shunchaki 2.Ke2 yurishi bo‘yicha biroz maslahat beryapman", dedi Nakamura.

Gap shaxmatda "Bongcloud" nomi bilan mashhur bo‘lgan, shohni o‘yinning boshidayoq oldinga chiqarishni nazarda tutuvchi noodatiy yurish haqida ketmoqda.

Nakamura ushbu yurishni Magnus Karlsenga qarshi jahon chempionati uchun tayyorlaganini hazil tariqasida aytib, endi tajribasini Sindarov bilan bo‘lishayotganini bildirdi.

"Ko‘ramiz, Sindarovmi yoki Gukeshmi — 2.Ke2 yurishini kim yaxshiroq qo‘llar ekan!" deya hazilini yakunladi Nakamura.

🏦O‘zbek va jahon sportiga oid eng so‘nggi yangiliklar: @Uzasport