Saudiya Arabistoni JCH-2034 uchun beshta stadion qurish rejasidan voz kechishi mumkin

Saudiya Arabistoni 2034-yilgi futbol bo‘yicha Jahon chempionatiga tayyorgarlik rejalarini qayta ko‘rib chiqmoqda. Mamlakatning Davlat investitsiya jamg‘armasi (PIF) mundial uchun barpo etilishi ko‘zda tutilgan beshta yangi stadion loyihasini bekor qilishi mumkin.

Semafor ma’lumotiga ko‘ra, xarajatlarni optimallashtirish jarayoni doirasida yangi arenalar qurilishiga ajratiladigan mablag‘ va resurslar qisqartirilishi kutilmoqda. Natijada Saudiya Arabistonining JCH-2034 uchun mo‘ljallangan stadionlari soni 10 taga tushishi mumkin.

Beshta loyiha rejadan chiqarilishi mumkin

O‘zgarishlar King Abdullah Economic City, Qiddiya Coast, Roshn, New Murabba va NEOM hududlarida qurilishi rejalashtirilgan stadionlarga taalluqli.

Mazkur arenalarning ayrimlari Saudiya Arabistonidagi yirik ko‘chmas mulk va infratuzilma loyihalarining bir qismi sifatida barpo etilishi kerak edi. Biroq ushbu loyihalarning ayrimlarida ishlar sekinlashgani yoki vaqtincha to‘xtagani stadionlar taqdiriga ham ta’sir ko‘rsatmoqda.

Shu bilan birga, hozircha yakuniy qaror qabul qilinmagan va tayyorgarlik konsepsiyasiga yana o‘zgartirish kiritilishi mumkin.

Boshqa stadionlar qurilishi davom etadi

Saudiya Arabistoni mundial infratuzilmasini butunlay qisqartirmoqchi emas. Dahran va Ar-Riyoddagi bir qator yangi arenalarni qurish rejalari amalda qolmoqda.

Yangi konsepsiya bo‘yicha mamlakat 2034-yilgi Jahon chempionatini 10 ta stadionda o‘tkazishi mumkin.

Ulardan to‘rttasi 2027-yil boshida Saudiya Arabistonida tashkil etilishi rejalashtirilgan Osiyo kubogi uchrashuvlarini ham qabul qilishi ko‘zda tutilgan.

NEOM stadioni ham ro‘yxatda

Bekor qilinishi mumkin bo‘lgan eng e’tiborga molik loyihalardan biri NEOM stadioni hisoblanadi.

U Saudiya Arabistonining ulkan futuristik loyihalaridan biri bilan bog‘liq holda qurilishi rejalashtirilgan edi. Biroq asosiy infratuzilma loyihalaridagi o‘zgarishlar stadion qurilishining kelajagini ham noaniq holatga keltirdi.

Saudiya Arabistoni 2034-yilgi Jahon chempionatiga mezbonlik qiladi. Shu bois yaqin yillarda mamlakat turnir infratuzilmasiga oid yakuniy rejalarini FIFA bilan muvofiqlashtirishi kutilmoqda.

Avvalroq Qatar ham 2022-yilgi Jahon chempionatiga tayyorgarlik jarayonida dastlab qurilishi rejalashtirilgan to‘rtta stadion loyihasidan voz kechgan edi.

🏦O‘zbek va jahon sportiga oid eng so‘nggi yangiliklar: @Uzasport