"۲۱آذر" _ نیسگیلی بیر گون

آذربایجانین اوزَرک¹ حکومتی‌نین ۸۰-جی قورولوش ایل دوُنومودور.
میللی حکومت بیر ایللیک قیسا² عمرونده آذربایجان اوچون چوخ دَیرلی ایشلر گوُردو:
آنادیلینده تحصیل،تبریز بیلیم یوردونون قورولوشو،قادینلارین سئچیم حاقی نین وئریلمسی،تورپاق اصلاحاتی و خالیصه تورپاقلارین کندلی‌لر آراسیندا بوُلوشدورولمسی،اَیالت مجلیسی‌نین قورولماسی،یوللارین آسفالتلانماسی،طیب مرکزینین یارادیلماسی و باشقا نئچه_نئچه دَیَرلی ایشلر.

۱۳۲۴-جی ایلین آبان آیی‌نین ۳۰-دا آذربایجان دموکرات فیرقه سی میللی مجلیسینی قوردو و آذر آیی‌نین ۲۱-ده سید جعفر پیشه وری باشچیلیغیلا میللی حکومتین قورولوشوغو اعلان ائدیلدی.

ایکینجی دونیا ساواشیندا سووئتلر و بریتانیا قوشونلاری ایرانی ایشغال ائده‌رک، بیرینجی پهلوی شاهین سورگون ائدیب و تجربه سیز اوغلونو یئرینه قویموشدو.
سووئت³ اردوسونو۱۳۲۵-جی ایلین اردیبهشت آییندا،ایرانین قوزئییندن⁴ تام چیخماسی ایله مرکزی حکومت و آذربایجان میللی حکومتی آراسیندا دانیشیقلار باشلادی و نتیجه ده خردادین ۲۳ ده پیشه وری و مظفر فیروزون آراسیندا آذربایجانا مختاریت وئرن بیر آنلاشما⁵ ایمضالاندی. بو آنلاشمایا دایاناراق، آذربایجان میللی مجلیسی‌نین اَیالت مجلیسی کیمی تانینماسی ایله اوزَرک حکومت گئنیش ایجرا صلاحیتلری وئریلدی؛ او جمله دن، استان والیلرینی تعیین ائتمه حاقی، آذربایجان گلیرلری‌نین دوُرددن اوچونونو یئرلی خرجلره آیریلماسی، تورپاقلارین کندلیلر آراسیندا بوُلونمسی، قادینلارین دا قوشولدوغو آزاد سئچکیلرین کئچیریلمسی، مکتبلرده آنادیلینده ائییتیم⁶ ایمکانی حتی ائتنیک آزلیقلارا‌.

بو آنلاشما ایجرا ائدیلسئیدی، ایراندا معاصر و قاباقجا فئدئرال ایداره چیلیک سیستئمی اساسینی قویا بیلردی، آمّا پهلوی رئژیمینین اویونبوزانلیغی، ۱۳۲۵-جی ایلین آذر آییندا مجلیسین سئچکیلرینه نظارت ائتمه بهانه سی ایله،آذربایجانا هجوم ائتمسی سونونجوندا بو آنلاشما هئچ واخت حیاتا کئچمدی.

آذربایجان اوُزگورلوک⁷ سئور قووتلری قتل عام ائدیلدی، میللی حکومت یاییتلادیغی کیتابلار یاندیریلدی و بو قیسا، لاکئن چوخ ثمره لی حاکمیت نهایت ۲۱ آذر ده  سونا چاتدی.
سونراکی ایلرده پهلوی رئژیمی آذربایجانلیلارین حاقلارینی وئرمک یولوندا هئچ بیر آددیم آتمادی هئچ، ترسینه هر ایل آذربایجان خالقینا قارشی ائدیلن بو قیرغینی،ایل دونومونو "آذربایجان خیلاصی"گونو کیمی اویدورما⁸ بیر آدلا قوتلادی.


۱. خودمختاری، ۲. کوتاه، ۳. شوروی، ۴. شمال، ۵. قرارداد، ۶. آموزش، ۷. آزادی، ۸. ساختگی.


#خطایی_مدنیت_اوجاغی

@uma_ocaq