Аусбарҭабжьаратә ҽазыҟаҵарақәа мҩаԥысит Очамчыра.

Аиқәырхаҩцәеи аруааи аԥырҩы дызҭам ахархәагақәа ржәылареи, аҭагылазаашьа ҷыдақәа раан ауааԥсыра ралгареи, ааха ахҟьаԥҟьақәа раԥыхреи рысценари аус адырулон ҳәа еиҳәеит АҶА ахада Алиас Аҩӡба.

"Аҽазыҟаҵарақәа хәшьара ҳаракыла инагӡан — амчрақәеи ахархәагақәеи еиқәшәаны аус руан, аинырра ишахәҭаз еиҿкаан. Иқәыргылаз адҵақәа зегьы нагӡоуп, анорматив иаԥыгангьы", — ҳәа азгәаиҭеит Аҩӡба "Аԥсныпресс" азы иҟаиҵаз ахҳәааҿы.

Аҽазыҟаҵарақәа рымҩаԥысшьа гәеиҭон Аԥсны Арбџьармчқәа ркомандаҟаҵаҩ хада Бадра Гәынба.