Адомбеиқәа хԥа Ԥсҳәы-Гәымсҭатәи аҳәырԥсаррахь иааргоит ашықәс нҵәаанӡа.

Адомбеиқәа хԥа Аԥсныҟа иаанашьҭуеит Урыстәыла Аԥсабара аминистрра иарҭоит. Аусбарҭа аҟазауаа заанаҵы аҳәырԥсарра аҵакыра гәарҭеит, аԥстәқәа рымҩангара аплан иақәшаҳаҭхеит ҳәа иҳәеит аекологиеи аԥсабарахархәареи рзы аҳәынҭеилакы ахантәаҩы Савели Ҷыҭанаа.

Аԥстәқәа аҭагылазаашьа ҿыцқәа ирышьцыларц азы аҭыԥқәа азырхиахоит. Даҽа хԥа иааиуа ашықәс азы ареспубликахь иааргоит.

"Аԥсуа телехәаԥшра" аинтервиу аҭо Ҷыҭанаа иҳәеит иахьатәи аамҭазы Ԥсҳәы-Гәымсҭатәи аҳәырԥсарраҿы адомбеиқәа ранҵаразы аҳауа, афатә даара ианаалоит, зҵаара хадас иҟоу — уи дара рыхьчара ауп.

Иара иажәақәа рыла, Аԥсны аҵыхәтәантәи адомбеи еихсны иршьит Ауадҳара 1927 шықәса рзы.

🖇 Адомбеиқәа рырхынҳәра апроект Урыстәыла аԥсабара министрра ацхыраарала инарыгӡоит. Аусмҩаԥгатәқәа рсиа азырхиоуп, ашықәс нҵәаанӡа ҩба-хԥа хы раагара азԥхьагәаҭоуп, 2026 шықәсазы — фба. Кавказтәи адомбеи реиҭарҿиара мҩаԥысуеит Апарламент адепутат Резо Занҭариа иаԥшьгарала.