Аԥснынтәи 60-ҩык инареиҳаны Сибратәи афедералтә университет агастрономиа Аинститут аҿы рзанааҭтә дырра аизырҳаразы акурсқәа ирхысхьеит.

Аҟәа иҟоу ацентр "Ҳара ҳаицуп" аҿы САУ агастрономиа Аинститут аҿы аԥснынтәи аспециалистцәа рзанааҭтә дырра аизырҳара акурсқәа рыпрограмма анагӡара абжьаратәи аихшьаалақәа ҟарҵеит. Апрограмма нагӡан аҳәынҭқарра ахада Бадра Гәынбеи Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенкеи раԥшьгареи реиқәшаҳаҭреи рыла.

Аиԥылара алахәылацәа иазгәарҭеит амаҵзуреи ауаажәларратә крыфареи русхк аҟны Аԥсны аекономика асекторқәа рыҿиаразы апрограмма аҵак ду шамоу, апрактикатә ҵакы шамоу.

Ареспублика аԥыза-министр ихаҭыԥуаҩ Вараздат Миносиан иазгәеиҭеит апроект азанааҭтә компетенциақәеи аусутә еимадара ҿыцқәеи рыҿиаразы ҭыԥны ишыҟалаз.

Аҵара аминистр Хана Гәынԥҳа лажәақәа рыла, абжьаратә профессионалтә ҵара аҿиара — атәыла аекономика аҭышәынтәалара ауп.

"Ҳтәыла еицырдыруеит ибеиоу атуристтәи ачысҟаҵаратәи традициақәа рыла, иахьа ҳтурист афатә хаа инаваргыланы иҭахуп иҳараку акультуратә еиҿкаареи амаҵзура ҳараки. Уи азы аҽазышәара аҭахуп. Ҳастудентцәа иахьа иуникалтәу алшара рымоуп Урыстәыла иреиӷьу аҵараиурҭақәа рҿы ари аҩыза аҟазара арҳаразы", — лҳәеит лара.

Апрограмма иалахәыз рхыԥхьаӡараҿы иҟан Аҟәатәи аусхкырацәатәи аиндустриатәи коллеџь астудентцәагьы. Аусҳәарҭақәа рнапхгаҩцәа иазгәарҭеит рыстудентцәа ирзыҟаҵаз азҿлымҳара ҳараки ирырҭаз аинформациа аҩаӡареи.

Аиԥылара анҵәамҭазы асертификатқәа ранашьан САУ аҿы ахаа-мыхаақәа ркурс хада иахысыз апрограмма алахәылацәа.