Арепатриациа Афонд адиректор ихаҭыԥуаҩ Ҭенгиз Анқәаб Sputnik Аԥсны иазеиҭеиҳәеит аицлабра иара изы еиуеиԥшым аспециалистцәа рабадырреи, командала аҽеидкылареи, наҟ-наҟ апроектқәа реицнагӡареи ахьалшо ҭыԥны ишыҟалаз.

"Аӡәырҩы рыблақәа амца хубаалоит, аӡәырҩы ҳтәылазы бзиарак ҟарҵарц иашьҭоуп. Урҭ алшара дуқәа рыҭоуп рреспублика аҿиараҿы рлагала аҟаҵаразы", — ҳәа азгәеиҭеит Ҭенгиз.

Аус здиуларц ииҭаху апроблемақәа ируакуп анапхгараҭаратә ӡбамҭақәа рыдкыларазы ихымԥадатәиу аинформациа ахаҭабзиара. Ҭенгиз иазгәеиҭеит хәышықәса инареиҳаны аинформатизациа аусхк аҟны аҳәынҭқарратә маҵзураҿы аус шиуаз — ахәҭакахьала, адыррақәа ашәҟәы рҭагалареи рхаҭабзиареи рызҵаарақәа инапы шрылакыз.
#social