Ҳажәлар 1992-1993 шш. рызтәи жәлар Рџьынџьтәылатә еибашьраан иргаз Аиааира иамшуп иахьа!

33 шықәса ҵуеит аԥыза иаша Владислав Арӡынба заԥхьа дгылаз ҳаԥсадгьыл аҵеицәеи, зыжәҩахыр ҳадызҵаз ахатәгәаԥхаҩцәеи, ҳдиаспора ахаҭарнакцәеи ақырҭуа мпыҵахалаҩ ҳадгьыл дықәырцеижьҭеи.

Нанҳәа 14 1992 шықәса рзы ақырҭуа архәҭақәа бџьарла еиқәных Аԥсны ианақәла, аԥсуа жәлар аҟазаареи аҟамзаареи ирыбжьагылеит. Аибашьра цон 413 мши-ҵхи. Ари аамҭа иалагӡаны иҭахеит 1700-ҩык аԥсадгьыл ахьчаҩцәа, шәҩыла аҭынч уааԥсыра.

Аԥсны Атәылахьчара аминистрра архив адыррақәа рыла, 1992-1993 шықәсқәа рзы Аԥсны жәлар Рџьынџьтәылатә еибашьра Аԥсны аганахьала иалахәын 12 нызқьҩык аибашьцәа, урҭ рыбжьара иҟан Ҭырқәтәыла инхоз ҳџьынџьуаа, Нхыҵ Кавказ ҳаиашьаратә жәларқәеи Урыстәыла аладатәи арегионқәеи рхаҭарнакцәа.

Зхы иамеигӡакәа ҳаԥсадгьыл зыхьчаз рыхьӡ кашәара ақәымзааит! Рхы зқәырҵаз Аԥсынра нагӡара ақәзааит! Ҽаанбзиала!
#social