Аԥсны Аиустициа аминистрреи Абызшәатә политиказы Аҳәынҭеилаки Аԥсны аҭоурыхтә географиатә хьыӡқәа рыхьчара нап адыркуеит.

Иахьа имҩаԥысит аминистр Анри Барцыци аилак аиҳабы Гәында Кәыҵниеи реиԥылара.

Мзызс иаиуит ашәарыцаҩцәеи аныҟәаҩцәеи иҟарҵаз аҳәара, урҭ игәарҭеит ашьха ҭыԥқәа рыхьӡқәа шеицаку.

Аҭоурыхтә географиатә хьыӡқәа атәыла акультуратә, абызшәатә ҭынха иахәҭакуп ҳәа азгәарҭеит аиԥылараҿы. Ҷыдала агәҭынчымра рызцәырнагоит аҳәаанырцәтәи аелектронтә хсаалагақәа, уаҟа ахархәаҩцәа лассы-лассы рхала аҭоурыхтә аобиектқәа ахьыӡ ҿыцқәа рырҭоит.

Аиустициа аминистрра ажәалагала ҟанаҵеит апрофильтә структурақәа рымчқәа еиднакыларц, "Агеографиатә обиектқәа рыхьӡқәа рзы" азакәан еиҳа хра аманы аус ауларц азы. Хықәкы хадас иҟоу уи ақәныҟәара иацклаԥшло аусбарҭа аилкаара ауп.

Гәында Кәыҵниаԥҳа аидеиа дадгылеит, агәрагара аалрыԥшит Аҳәынҭеилакы ацхыраара аҟаҵара ишазыхиоу. Излеилкаахаз ала, уаанӡа ари аусхк аҭагылазаашьазы аилак акомпетенциа иаҵанакуан, аха ԥыҭрак ашьҭахь уи азы апунктқәа уантәи иаҟәыргеит.

Иалкаау ауснагӡатәқәа разгәаҭаразы ргәы иҭоуп Аҭҵаарадыррақәа ракадемиеи Аҳәынҭқарратә кадастртә палатеи алархәны инарҭбаау аиԥылара амҩаԥгара. Ирылацәажәараны иҟоуп аофициалтә хьыӡқәа закәаншьаҭада рхархәареи реицакреи рзы аҭакԥхықәра азҵаарагьы.