Лыԥсҭазаара далҵит Аԥсны зҽаԥсазтәыз ажурналист Заира Ҵәыџьԥҳа ҳәа аарыцҳауеит агазеҭ "Республика Абхазия" аколлектив.

Ҵәыџьԥҳа лусуратә мҩа хацлыркит 19 шықәса анылхыҵуаз Казань агазеҭ "Советская Татария" аҟны. Анаҩс аус луан Гәдоуҭатәи араионтә газеҭ "Бзыԥ" аҟны, Гәдоуҭеи Гагреи рҿы "Советская Абхазия" акорреспондентс.

1991 шықәса раахыс аус луан "Республике Абхазия" аҳәаанырцәтәии аҩнуҵҟатәии аинформациа аҟәша аредакторс, иара убас агазеҭ апарламенттә корреспондентс.

Аԥсны Аџьынџьтәылатә еибашьра ашықәсқәа раан Заира Ҵәыџьԥҳа аибашьра иазкыз ажәабжьқәа лыҩуан, амацәаз иҭакыз Тҟәарчалҟа дцон аинформациа аизгаразы.

2001 шықәса инаркны 2003 шықәсанӡа лара Аминистрцәа реилазаараҿы аус луан аԥыза-министр ипресс-маӡаныҟәгаҩыс, амассатә информациа ахархәагақәа рзы ареферентс. Акыр шықәса аҳәса ржурнал "Леди-босс" алитературатә редакторс дыҟан.

Ҵәыџьԥҳа авторс дамоуп еиуеиԥшым ашықәсқәа рзы илҩыз аматериалқәа реизга "Акәашара, аԥсҭазаара еиԥш".