Аԥсуа шәҟәыҩҩы, апублицист Даур Занҭариа изку асахьаркыратә фильм "Мириада" аҭыхрақәа ирылагоит 2027 шықәсазы, абри атәы Sputnik иазеиҭалҳәеит автор, арежиссиор Атана Агрԥҳа.

Лара лажәақәа рыла, афильм атизер хиоуп, агрант аиуразы Урыстәыла акультура аминистрраҟны апроект сынтәа ихьчахоит. Арҿиаратә команда еизгоуп, актиорцәагьы ароль хадақәа рзы ишьақәырӷәӷәоуп.

"Ароль хадақәа нарыгӡоит Пиотр Фиодорови – Даур Занҭариа ироль назыгӡо, Сергеи Гилеви. Урҭ Урыстәыла иреиӷьу артистцәа иреиуоуп", — ҳәа азгәалҭеит лара.

Апроект аус адырулоижьҭеи хәышықәса иреиҳауп. Асценари ҩуп Даур Занҭариа имшынҵақәа, иҩызцәа ргәалашәарақәа рышьаҭала. Урҭ рхыԥхьаӡараҿы дыҟоуп Атана Агрԥҳа лангьы.

Апроект автор лгәы иҭоуп ашәҟәыҩҩы иҭоурых мацара акәымкәа, иахьатәи аԥсуа интеллигенциа рхаҭарнакцәа реизгатә хаҿсахьа аарԥшра.

🖇 Еицырдыруа аԥсуа шәҟәыҩҩы, апоет, апублицист Даур Занҭариа диит лаҵара 25 1953 шықәсазы. Иара ипрозаҿы иааирԥшит аԥсуа қыҭа аԥсҭазаара, аҵасқәа, ақьабзқәа, аишәачарақәа, алегендақәа, иахьатәи аамҭа.

Даур Занҭариа иԥсҭазаара далҵит 2001 шықәсазы.