Беларусь праз 14 гадоў вярнулася ў міжнародны конкурс «Вікі любіць славутасці».

Конкурс «Вікі любіць славутасці» (Wiki Loves Monuments) працягнецца да канца кастрычніка на платформе Wikimedia Commons.
Папярэдні раз беларускі сегмент браў удзел у гэтым спаборніцтве ў 2012 годзе.

Аўтары пяці найлепшых фатаграфій атрымаюць электронныя падарункавыя сертыфікаты наміналам 200 рублёў для пакупак у інтэрнэт-крамах.

У рамках сёлетняга конкурсу пакуль загружана ўжо больш за 1 170 файлаў, пры гэтым 32 з іх ужо прызнаныя якаснымі — толькі каля 0,3 % фотаздымкаў маюць падобную адзнаку.

Для ўдзелу ў кампаніі 2026 года створаны тэкставы рэестр аб'ектаў на базе праекта рускага Wikivoyage. Спісы размеркаваныя па абласцях і раёнах. У іх уключаныя афіцыйныя помнікі архітэктуры і гістарычныя пабудовы, створаныя да 1990 года, якія часткова ўзятыя з краязнаўчага каталога «Глобус Беларусі». Для геаграфічнага пошуку працуе інтэрактыўная карта. Загружаць файлы неабходна строга праз індывідуальныя спасылкі аб'ектаў з гэтай карты, каб выява аўтаматычна прывязвалася да ідэнтыфікатара помніка ў энцыклапедычнай базе.

Ад удзельнікаў патрабуецца загружаць файлы памерам не менш за 2 мегапікселі пад свабоднай ліцэнзіяй, пазбягаючы дублявання аднатыпных ракурсаў. Асобны блок правіл рэгулюе лічбавую апрацоўку. Для тэхнічных фатаграфій, якія фіксуюць стан помнікаў, дапускаецца толькі мінімальнае ўмяшанне. Мастацкая апрацоўка дазволеная, але патрабуе абавязковага ўдакладнення ў апісанні файла, а ў ідэале — паралельнай загрузкі зыходнага здымка. Любое прымяненне сродкаў штучнага інтэлекту для генерацыі або паляпшэння дэталяў павінна быць строга задэклараванае. Вадзяныя знакі і аўтарскія подпісы на выявах забароненыя.

Фота: Budgawl / Wikimedia Commons