ترپنمه آماندیر، بالا، غفلت‌دن آیئلما!
آچما گوزونو، خواب جهالت‌دن آیئلما!
لای لای، بالا، لای لای
یات، قال دالا، لای لای!
آلدانما آیئقلئقدا فراغت اولا! هیهات!
غفلتده کئچنلر کیمی لذّت اولا! هیهات!
بیدار اولانئن باشی سلامت اولا! هیهات!
آت باشئنی یات! بستر ِ راحت‌دن آییلما!
لای لای، بالا، لای لای
یات، قال دالا، لای لای!
آچسان گوزونو رنج و مشقّت گوره‌جکسن
ملّت‌ده غم، امّت‌ده کدورت گوره‌جکسن
قئلدئقجا نظر ملّته، حیرت گوره‌جکسن
چک باشئنا یورغانئنی، نکبت‌دن آییلما!
لای لای، بالا، لای لای
یات، قال دالا، لای لای!
بیر لحظه آیئلدئن‌سا قوتار جانئنی، یوخلا
آت تریاکینی، چک بابا قلیانئنی، یوخلا
اینجینسه ساغئن، وئر یئره سول یانئنی، یوخلا
ایللرجه شعار ائتدیگین عادت‌دن آییلما!
لای لای، بالا، لای لای
یات، قال دالا، لای لای!
گوز نوری‌دئر اویقو، اونو، دور ائتمه گوزوندن
یول وئرمه مبادا چئخا بیر لحظه سوزوندن
اما ائله برک یوخلاکی، حتی گئت اوزوندن
آفاقی دوتان شور و قیامت‌دن آییلما!
لای لای، بالا، لای لای
یات، قال دالا، لای لای!
شاعر: میرزا علی‌اکبر صابر
صدا: سهیل قاسمی
@Setiq
Post #3962
762
لای لای بالا لای لایمیرزا علی اکبر صابر
- 👏 4
- 👍 2
- 😭 1