219. Çынсем санран эрехпе этеме хĕртсе яракан вăйăсем пирки ыйтаççĕ. Çапла пĕлтер: «Вăл та, ку та этеме пысăк сиен кÿрет. Анчах та вĕсен усси те çук мар. Çав-çавах эрех патне тата этеме хĕртсе яракан вăйăсем патне çывхаракан çын çав тери пысăк çылăха кĕрет». Çынсем санран пурлăхăн хăш пайне чухăнсемпе нуша куракансене пама уйăрса хумалли çинчен ыйтаççĕ. «Хăвăр усă курнă хыççăн юлнă пурлăха», – тесе пĕлтер. Çапла майпа Çÿлти Турă сире Хăйĕн Сăмахне пĕлтерет, Хăйĕн Сăмахне сире ăнлантарса парать. Тен, эсир çакăн çинчен шухăшлатăр та тÿрĕ çул çине тăратăр.
220. Тен, çакна илтсен эсир пурнăç çинчен, хăвăра леш тĕнчере мĕн кĕтни çинчен кăшт та пулин шухăша каятăр. Вĕсем санран тăлăха юлнă ачасем пирки ыйтаççĕ. Çапла хуравла: «Тăлăха пулăшни вăл – ырă ĕç». Енчен те эсир хăвăр пурлăхăра тăлăха юлнă ачан пурлăхĕпе пĕрлештеретĕр пулсан, тăлăха хăвăр пата илсе ăна вĕрентетĕр пулсан, ăна ырă сĕнÿ-канаш паратăр пулсан, пĕр-пĕриншĕн тăван евĕр пулатăр. Ан манăр – Çÿлти Турă чыссăр çынна та, ырă тăвакан çынна та курать. Турă сире усал суннă пулсан, эсир йывăр лару-тăрăва е пĕр-пĕр инкеке лекнĕ пулăттăр. Чăн калатăп: тĕнчесен пĕртен-пĕр Турри тем тума та пултарать. Вăл аслă, мухтавлă, хăватлă.

#чувкоран