Келинг,
Аё шайхим,
Ўқинг “Таборак”,
Кўзимнинг косаси тўлсин лиммо-лим.
Сизга тиловатдан ажр олмоқ керак,
Менга сукунатдан ажралмоқ лозим.
 
Бир оҳанг истайман – баридан латиф,
Тингласам, келтирса руҳни бўғзимга.
Оний қироат-ла танни титратиб,
Ўзимни суғуриб олинг ўзимдан.
 
Ўқинг, вужудимни тарк этмасин дард,
Топгандай бўлайин Ишқни ахтариб.
Шайхим, ногоҳ чиқиб кетдим ўзимдан,
Шайхим, мени яна менга қайтаринг!
 
Келинг, аё шайхим, ўқинг “Таборак”...
 
Ҳикмат Бойқобилов