Mingyillik va ming yillik: qay biri toʻgʻri?

Yillik soʻzi sonlar va miqdorni bildiruvchi soʻzlar bilan qoʻllanganda ajratib yoziladi: ming yillik, koʻp yillik, besh yillik, oʻn yillik kabi.

Besh yillik rejalar muhokama qilindi. Oʻn yillik natijalarga eʼtibor qaratildi.

Doim ajratib yoziladimi? Yoʻq, qoʻshib yoziladigan holatlar ham bor. Lekin kamdan-kam uchraydi.

Yuzyillik soʻzi baʼzan asr maʼnosida qoʻllanadi. Bunda soʻz qoʻshib yozilishi kerak:

Insoniyat yangi yuzyillikda jiddiy muammolarga duch kelyapti.

Mingyillik soʻzi esa oʻn asrga teng vaqtni anglatadi:

Insoniyat uchinchi mingyillikda oʻzaro urushlar va adovatlarga chek qoʻyishi kerak.

Lekin vaqt birligi maʼnosini anglatmay, ming yilga moʻljallangan yoki yoshi ming yilga teng degan maʼnoda kelganda soʻz ajratib yoziladi:

Birlashgan Millatlar Tashkilotining Ming yillik rivojlanish maqsadlarini Oʻzbekistonda amalga oshirish boʻyicha olib borilayotgan ishlar muhokama qilindi.

Samarqand-Kitob yoʻlida hazrat Navoiy va buyuk munajjim Ulugʻbek zamonasidan qolgan ming yillik chinorlar hali ham shovullab turibdi.
“Oʻzbekiston qoʻriqlari”.

Yuzyillik soʻzi ham, mingyillik soʻzi ham izohli va imlo lugʻatlariga kiritilmagan.

@oriftolib | Sahifalarimiz