​Sogʻlik va sogʻliq

Soʻzning har ikki shakli toʻgʻri. Ular sogʻ-salomat boʻlish, salomatlik, sogʻlomlik maʼnolarida qoʻllanadi:

Sogʻligim – boyligim.
Maqol.

Tani sogʻlik – tuman boylik.
Maqol.

Teng miqdorda sabzi, qizilcha, bodring sharbatlaridan kokteyl qilinib, ovqatdan oldin ichilsa, sogʻlik va kayfiyat yaxshi boʻladi.
“Fan va turmush”.

Sogʻliqni saqlashning asosiy tadbiri badantarbiya boʻlib, keyin ovqat va undan soʻng uyqu tadbiridir.
“Saodat”.

Negadir 2013-yilgi imlo lugʻatiga sogʻlik soʻzi alohida holatda kiritilmagan. Lekin sogʻlik-salomatlik, sogʻlik-sergaklik soʻzlari lugʻatda bor. Izohli lugʻatda esa sogʻlik soʻzi sogʻliq soʻzining varianti sifatida koʻrsatilgan.

Bu ikki soʻzni almashlab qoʻllash mumkin. Lekin baʼzi birikma va iboralarda til va koʻz oʻrgangan variantni tanlagan maʼqul.

Sogʻliqni saqlash vazirligi nomida esa faqat sogʻliq varianti ishlatiladi. Chunki u rasmiy nom sifatida shunday qabul qilingan.

📌 Demak,

Sogʻliq, sogʻlik, sogʻliqni mustahkamlash, Sogʻliqni saqlash vazirligi ✅

@oriftolib | Sahifalarimiz