TDYU ilmiy xodimlarining maqolalari Nagoya universiteti jurnalida chop etildi

Toshkent davlat yuridik universiteti ilmiy xodimlarining xalqaro xususiy huquq, islomiy moliya va xalqaro investitsiya arbitrajining dolzarb masalalariga bag‘ishlangan maqolalari “Nagoya University Journal of Law and Politics” ilmiy jurnalining 311-sonida chop etildi.

Xususan, TDYU Xalqaro huquq va qiyosiy huquqshunoslik fakulteti Tadqiqot markazi rahbari, yuridik fanlar doktori Ahadjon Xakimovning “The Significance and Role of Private International Law under Global Legal Pluralism (3): A Case Study of Civil and Commercial Disputes Arising from Islamic Finance” nomli ilmiy maqolasi jurnalda yapon tilida e’lon qilindi.

Maqola A.Xakimovning “The Significance and Role of Private International Law under Global Legal Pluralism” mavzusidagi turkum maqolalarining uchinchi qismi bo‘lib, unda olimning Yaponiyada olib borgan 3,5 yillik ilmiy-tadqiqot faoliyati natijalari aks etgan.

Tadqiqotda islomiy moliya sohasida yuzaga keladigan fuqarolik va tijorat nizolarini xususiy xalqaro huquq asosida tartibga solish, global huquqiy plyuralizm sharoitida turli huquqiy tizimlarning o‘zaro munosabati, mazkur nizolarga nisbatan qo‘llaniladigan huquqni aniqlash hamda islomiy moliya bilan bog‘liq nizolarni hal etishning huquqiy jihatlari tahlil qilingan.

Shuningdek, fakultet Tadqiqot markazi katta ilmiy xodimi, yuridik fanlar doktori Farruh Tuychiyevning “Regulation of Third-Party Funding in Investor-State Arbitration in Uzbekistan and Kazakhstan: One Region, Different Regulatory Regimes” nomli ilmiy maqolasi ham jurnalning mazkur sonida chop etildi.

Ilmiy ishda O‘zbekiston va Qozog‘iston misolida investor hamda davlat o‘rtasidagi xalqaro investitsiya arbitrajida uchinchi taraf tomonidan moliyalashtirish (Third-Party Funding) institutining huquqiy xususiyatlari qiyosiy tahlil qilingan.

Tadqiqotda uchinchi tomon moliyalashtirishining nazariy va huquqiy asoslari, manfaatlar to‘qnashuvi bilan bog‘liq masalalar, arbitraj xarajatlarini moliyalashtirish mexanizmlari, O‘zbekiston va Qozog‘istondagi mavjud huquqiy yondashuvlar, xalqaro investitsiya arbitraji amaliyotidagi zamonaviy tendensiyalar o‘rganilgan.

Muallif bir mintaqada joylashgan ikki davlatdagi turli huquqiy tartibga solish mexanizmlarini qiyoslab, ushbu institutning zamonaviy xalqaro investitsiya arbitrajidagi o‘rni va o‘ziga xos jihatlarini yoritib bergan.

Maqolalar bilan tanishish...