TDYU talabalari adliya organlarida tajriba orttiradi

Toshkent davlat yuridik universiteti Biznes huquqi va sud himoyasi fakultetining 3-bosqich talabalari uchun dual ta’lim doirasidagi amaliy mashg‘ulotlar boshlandi.

Talabalarni amaliy ta’lim joylariga navbatdagi taqsimlash jarayoni Toshkent shahar adliya boshqarmasida tashkil etilib, ular boshqarmaning tegishli tarkibiy bo‘linmalariga biriktirildi.

Taqsimlash jarayonida talabalarga boshqarma faoliyatining asosiy yo‘nalishlari, tarkibiy bo‘linmalarning vazifa va vakolatlari, ichki tartib-qoidalar va mehnat intizomi, amaliy mashg‘ulotlarni o‘tash tartibi, bajarilishi lozim bo‘lgan vazifalar hamda kasbiy etika va mas’uliyat talablari bo‘yicha tushuntirishlar berildi.

Dual ta’lim jarayonida talabalar universitetda olgan nazariy bilimlarini amaliyotda mustahkamlash, huquqiy hujjatlar bilan ishlash, real ish jarayonlarini kuzatish hamda tajribali mutaxassislarning faoliyati bilan yaqindan tanishish imkoniyatiga ega bo‘ladi.

Shuningdek, amaliy mashg‘ulotlar talabalarda huquqiy vaziyatlarni tahlil qilish, hujjatlar loyihalarini tayyorlash, asoslantirilgan xulosalar ishlab chiqish va xizmat vazifalariga mas’uliyat bilan yondashish kabi muhim kasbiy ko‘nikmalarni rivojlantirishga xizmat qiladi.

TDYU va Toshkent shahar adliya boshqarmasi o‘rtasidagi mazkur hamkorlik ta’lim hamda amaliyot integratsiyasini kuchaytirish, talabalarni kelgusidagi professional faoliyatga tayyorlash va zamonaviy talablarga javob beradigan malakali yuridik kadrlarni yetishtirishda muhim ahamiyat kasb etadi.