TDYU rektori akademik litsey jamoasi bilan ochiq muloqot o‘tkazdi

Toshkent davlat yuridik universiteti huzuridagi H.K.Muhitdinova nomidagi akademik litseyda TDYU rektori, yuridik fanlar doktori, professor Baxshillo Xodjayevning pedagog-o‘qituvchilar bilan uchrashuvi tashkil etildi.

Uchrashuvda litseyda ta’lim sifatini yanada oshirish, pedagoglarning kasbiy va metodik salohiyatini rivojlantirish, o‘quv-tarbiya jarayoniga zamonaviy yondashuvlarni joriy etish, iqtidorli o‘quvchilarni aniqlash va ularni qo‘llab-quvvatlash, akademik litsey va universitet o‘rtasidagi hamkorlikni mustahkamlash masalalari muhokama qilindi.

Ochiq muloqot davomida pedagog-o‘qituvchilarning ta’lim jarayonini takomillashtirishga oid taklif va fikrlari tinglandi. Mavjud masalalarni samarali hal etish hamda kelgusida amalga oshiriladigan ustuvor vazifalar yuzasidan fikr almashildi.

Shuningdek, TDYU rektorining litseyga tashrifi doirasida o‘quvchilar uchun “Rektor soati” ham tashkil etildi. Unda universitet rektori Baxshillo Xodjayev yoshlar bilan samimiy va ochiq muloqot olib bordi.

Rektor o‘quvchilar uchun mamlakatimizda va xalqaro miqyosda yaratilayotgan ta’lim imkoniyatlari, TDYUning xorijiy universitetlar bilan hamkorlikdagi qo‘shma ta’lim dasturlari hamda yuridik ta’lim sohasida amalga oshirilayotgan islohotlarning mazmun-mohiyati haqida ma’lumot berdi.

Shuningdek, amalga oshirilayotgan islohotlar natijasida o‘quvchilar erishayotgan yutuqlar alohida e’tirof etildi.

“Rektor soati” davomida o‘quvchilar o‘zlarini qiziqtirgan savollarga javob oldi.

Mazkur uchrashuvlar pedagoglar faoliyatini qo‘llab-quvvatlash, o‘quvchilarning intilishlarini rag‘batlantirish, litsey va universitet o‘rtasidagi ta’limiy uzviylikni mustahkamlash hamda bilimli, tashabbuskor va raqobatbardosh yoshlarni voyaga yetkazishga xizmat qiladi.