Мускоысь удмурт культурая клублэн @https://t.me/zhilityar кылем пумиськоназ лыдӟи Кедра Митрей сярысь доклад. Кедра Митрей сярысь мон куать-сизьым ар пыр-поч, кузь лекциен выступать ӧй карылы. Котьку но тросгес, мургес, шонергес верам потэ, но жаляса верано, тодосчи луон – со нуналлы быдэ ужан, лыдӟиськон, малпаськон но гожъяськон. Огдырлы вис кариськод но – тон чигнаськод ини. Соин мон шумпотӥсько лекция верай шуыса, тодам ваи Кедра Митрейлэсь творчествозэ, малпаськи, дунъет лэсьтӥ.

Озьы ик туж дуно, куке ужам уждэ дунъяло но мар ке пайдазэ дэмлало. Ужрадэ пыриськиз Вера Григорьевна Пантелеева – усто тодосчи, литературовед. Со мыным сётӥз идея: Кедра Митрейлэсь печатламтэ рукописьёссэ поттоно. Зэмзэ вераса, мон ачим куке но та сярысь малпаськи вал – малпай но куштӥськи талэсь, ой секыт, уг вормы шуыса. Нош укмыс ар ортчиз диссертациме гожтэме но утеме бере но – табере мон уг кышкаськы ни та уж борды кутскыны. Йӧскалык библиотекаын «Литературно-выставочный центр» ёзэтын ужасько бере, аслам уж дурам но та проект борды басьтӥськыны луысал. Малы мон тае гожтӥсько ваньзэ – планъёсме? Ӧй ке быдэсты мон та малпанме, кин ке, та гожтэмме лыдӟыса, уз вунэты но, улонэ пыӵатоз – малы ке шуоно, Кедра Митрейлэн автобиографиез одно ик печатласькыны кулэ.