33. Мария Векшина. Лякиё дунне: гурт мадёсысь люкетъёс, верос, новеллаос. Ижевск: Удмуртия, 2025. 160 б.

Туала гожъясьчиос чеберлыко литератураен вырыса, кӧтсэс тырыны уг быгато. Ма, совето писательёс но куинетӥ сменае, уин гожъяськылӥзы. Но соослы тыризы ӟеч гонорар, сётӥзы творческой отпуск, соос быгатылӥзы шутэтскыны санаторийёсын, веранэз ӧвӧл, лыдӟисьёс но тросгес вал – учке ай удмурт газет-журналъёслэсь совето вакытысь тиражъёсссэс. Али югдур воксё мукет, соин удмурт чеберлыко литературамы но воштӥськиз. Солэн вань огъя тодметэз: прозаын ӧвӧл сюжетъёс, драматургиын ӧвӧл конфликт, ӵошатоно ке азьвылэныз удмурт совето литератураен.

Туала югдурын но удмурт авторъёс – асьсэды писатель ке шуо, ӟеч ужало. Конфликт ӧвӧл ке но ужъёсазы, отын асьме вакыт шока. Мария Векшиналэн «Лякиё дунне» книгаяз котырысь улонлэн тодметэз усто возьматӥське. Мон та ужез шуысал мемуарной, автобиографической прозалы матын. Тодэ ваёнъёсын адямилэн улонэз но матысь муртъёс сярысь малпанъёсыз пусъемын луо. М. Векшиналэн книгаысьтыз «Кӧтерын» уж – со быдэстымтэ повестьысь люкетъёс. Автор суреда туала гуртысь улон югдурез. Сюжеттэм повествованиын геройёсты но учыръёсты автор матэ карыса уг возьматы – огъя кылъёсын но кыдёкысенгес. Но озьы ке но – туж тунсыко, Кӧтер нимо туала удмурт гуртлэн тусыз лыдӟись азе яркыт пуксе.

Книгалэн кыкетӥ люкетэз – со вакчи ужъёс – новеллаос но одӥг верос. Котькудӥз гожтэмез лыдӟись пушкын мае ке бугыртэ, тодмо малпанэн валче мае ке выльзэ усьтэ, кыӵе ке выль идея новеллаын бычыраны кутске кадь, но автор сое пыр-поч уг усьты, произведение кыле набросок луыса – мон нош верасько – та ваньмыз мемуаристика ӧрлэн тодметэз. «Перфиллэн киосыз» верос та ласянь мукетгес - татын дунне шоры учкон но геройлэсь сямзэ усьтон мур пӧрмем.

Новеллаосын автор суреда Ижкарез – урамъёсты но из юртъёсты, студенческой огъяулонниез но отысь егитъёсты, малпаськемзэс – улонэз огъя концепциен валаны тыршемзэс. Новеллаосын мукетыз тунсыко тема – поездын проводник луыса ужась нылмуртэн кылэм-адӟемез – возьматэмын. Сюрес вылын пумисько удмурт гуртысь нылмурт-проводница но Мускоысь туж узыр воргорон, солдатъёс, гастарбайтеръёс – пӧртэм выжы калыкысь, мукет религиен но мукет осконэн улӥсь муртъёс. Ваньмыз та егит адямилэсь быдэ вуонзэ, кыдамзэ сэрттӥсь-пертчись темаез усьтэ. Та темаен удмурт литературалэн историяз Мария Векшина аслэсьтыз интызэ басьтӥз ини – «Оӵ /Ӧч кар» (2019) романэз ик пусйытэк кельтоно ӧвӧл. Роман сярысь «Кенеш» журналын бадӟым отзыв гожтӥ вал.