32. Трофим Архипов. Ортчеменыз пумиськон: повесть. Ижевск: Удмуртия, 1971.

Яндекс музыкаен наушникъёсты куштылыса (акыльтыса аудиороманлэсь), удмурт кылын повестез лыдӟон борды берытскылыса (сое психологически лыдӟыны секыт вал), быдэстӥ ик Трофим Архиповлэсь «Ортчеменыз пумиськонзэ».

Татын суредамын Гозег гуртысь Онтон Прошка нимо пияшлэн пичи дырыз – вордскемез дырысен подросток луытозяз. Пичи дырыз солэн учыраз туж секыт вакытэ: 1917-тӥ арын кунын кивалтэт воштӥськиз но ар ортчыса граждан ож пуромиз, ёрмыса улон кутскиз, гуртын – кулаке поттон. Трофим Архипов (1908–1994) – бадӟым удмурт писатель – та огыр-бугыр вакытэз векчи детальёс но трос сюжетной линиос пыр яркыт, син азе пуктымон суреда.

Повесть 1967-тӥ – 1970-тӥ арын гожтэмын. Но татысь отрицательной геройёс – узыръёс Кондӥ Павол, Пужей Миктаен Пужей Балян возьматэмын кужымзэс гажаса: соос ужась, шаплы муртъёс, узырлыксэс но эриксэс утён понна зол жугисько.

Вакчи но капчи предложениосын автор лыдӟисьлэн син азяз пуктэ сӥзьыл нюлэскысь вазь ӵукнаез, гужем возьвылэз но гуртысь тол куазез – детальёс пыр, но удмурт фольклорысь инкуазез возьматон амалъёсты кутыса.

Нош атайтэк-анайтэк кылем Прошкалэн куректэмез но солэн огнын улэмез – макем со жаль потэ. Висись анаезлэсь кулэмзэ пичи пилы огназлы адӟыны кылдӥз – кӧшкемыт но сюлэмез позыртӥсь эпизод! Прошка котьку огназ. Александр Шкляев критик вераз вал, Трофим Архипов пичиысен сирота кылиз шуыса. Жаль, со, пе, тодэ ваёнъёссэ ӧз гожты пичи дырыз сярысь. Прошка сярысь повестяз Трофим Архипов оген кылем пиналлэсь улэм-вылэмзэ возьматыкуз, аслаз ортчеменыз пумиськиз, дыр. Сотэк гожтысал меда такем зол повесть?