У артыкуле 10 Канстытуцыі Беларусі чорным па белым напісана: «Ніхто не можа быць пазбаўлены грамадзянства Рэспублікі Беларусь або права змяніць грамадзянства».
Здавалася б, што тут незразумелага? Ніхто - значыць ніхто. Ні палітычны апанент улады, ні асуджаны паводле крымінальнага артыкула, ні беларус, які вымушана пакінуў сваю краіну. Але ў студзені 2023 года беларускія ўлады змянілі Закон «Аб грамадзянстве Рэспублікі Беларусь» і з гэтага часу з'явілася магчымасць спыняць нават грамадзянства, атрыманае па нараджэнні, у дачыненні да людзей, якія знаходзяцца за мяжой і асуджаныя паводле пэўных крымінальных артыкулаў.
Пры гэтым заканадаўца выкарыстаў вельмі зручнае слова - «страта». Не пазбаўленне, якое забараняе Канстытуцыя, а страта, якую нібыта дазваляе закон. Але ці можна абысці Канстытуцыю, проста замяніўшы адно слова іншым?
Я як юрыст сцвярджаю: не. Давайце разбяромся.