Арменія дазволіла выезд беларусцы, якая знаходзілася ў міжнародным вышуку па палітычных матывах

У 2020 годзе Наталля (імя зменена з меркаванняў бяспекі) ўдзельнічала ў мірных пратэстах і ўваходзіла ў кіраўніцтва аднаго з чатаў, дзе беларусы абмяркоўвалі сітуацыю ў краіне. Яе незаконна затрымлівалі па палітычных артыкулах, і пасля допыту яна была вымушана пакінуць Беларусь.

У 2025 годзе, падчас падарожжа, калі Наталля прызямлілася ў Арменіі, ёй паведамілі, што яна не можа пакінуць краіну, бо знаходзіцца ў міжнародным вышуку па запыце рэжыму Лукашэнкі.

У падтрымку Наталлі выступілі Офіс Святланы Ціханоўскай, намеснік кіраўніцы Аб’яднанага Пераходнага Кабінета, кіраўнік НАУ Павел Латушка, праваабарончы цэнтр «Вясна», дабрачынныя фонды BySol і ByHelp, адвакатка Марыя Колесава-Гудзіліна, а таксама прававая камісія Каардынацыйнай Рады. Юрыдычную падтрымку ў Арменіі аказвала арганізацыя «Грамадскі вердыкт».

Павел Латушка накіроўваў амбасадару Арменіі ў Польшчы Аляксандру Арзуманяну асабістыя лісты з адпаведнай просьбай. Па ініцыятыве пасла Арменіі адбылася тэлефонная размова з Паўлам Латушкам, быў усталяваны кантакт з Хельсінкскім камітэтам Арменіі. Таксама кіраўнік НАУ звярнуўся да Генеральнай пракуратуры Арменіі. У выніку пасля разгляду справы Пракуратура Арменіі выдала афіцыйны дазвол на выезд грамадзянкі Беларусі, якая знаходзілася ў міжнародным вышуку па палітычных матывах.

Беларуска Наталля пакінула Арменію і прыбыла ў Еўрапейскі саюз. Зараз яна ў бяспечнай краіне разам са сваёй сям'ёй.

Гэта толькі адзін з канкрэтных прыкладаў нашай працы па дапамозе беларусам, якія апынуліся ў складаным становішчы з-за рэпрэсій рэжыму Лукашэнкі.