Штрыхі да скандальнай тэмы "Ціханоўскі супраць СМІ і Ціханоўскай".

Чытаючы публікацыю The New York Times пра нядаўняе вызваленне 25 беларускіх палітвязняў, я знайшоў і такі пасаж (выбачайце, калі пераклад недасканалы):

"Муж спадарыні Ціханоўскай Сяргей, якога арыштавалі напярэдадні галасавання, каб не дапусціць яго да ўдзелу ў выбарах [2020 года], быў вызвалены летась. Апошнія некалькі месяцаў ён канфліктаваў са сваёй цяпер аддаленай ад яго жонкай і яе памочнікамі праз выкарыстанне імі грантавых сродкаў, выдзеленых замежнымі ўрадамі.

Ён горка скардзіўся, што апазіцыйныя СМІ, якія кантралююцца офісам спадарыні Ціханоўскай, прыніжаюць былых палітвязняў, такіх як ён сам і Марыя Калеснікава — папулярная прадстаўніца апазіцыі, вызваленая з турмы ў снежні".

Акрамя таго, аўтары выдання мяркуюць, што "вызваленне зняволеных не толькі дапамагло спадару Лукашэнку аслабіць крытыку на яго адрас у Вашынгтоне, але і адпавядала ягоным унутрыпалітычным інтарэсам, бо падрывае пазіцыі апазіцыйнага руху ў выгнанні, які ўзначальвае былая кандыдатка ў прэзідэнты Святлана Ціханоўская".

Як бачым, рэха праблем беларускай палітычнай эміграцыі і разборак у яе асяроддзі гучыць ужо і ў амерыканскай прэсе.