Уыдис-иу ахæм хъæутæ, æмæ-иу уыцы бон куыстмæ фæцæйцыдысты, æмæ сæ уæд кодтой ивар. Ахæм хабар æрцыд Куырттаты комы Хидыхъусы. Хидыхъусы сауджын уыдис Дз…ы Датъо. Майрæмы куадзæны бон адæм куыстмæ цæудзысты, зæгъгæ, уый рагацау слæууыд хъæугæрон æмæ, чи цыдис, уыдон фæстæмæ здæхта. Чи нæ бакуымдта раздæхын, уыдоны та ивар фæкодта уæды æхцайæ фæндзгай сомтæй. Хъæуыхицау уыцы лæгты бакодта ахæстоны, уымæн æмæ сæ ивæрттæ нæ фыстой, фæлæ цы сæ бон уыдис, æмæ сæ фæстагмæ бафыстой. ⁕⁕⁕⁕ Сауджынтæ куы фæзындысты ирон адæмы æхсæн, уæд, цалынмæ хицауадæй гæххæтт уыдаид, уæдмæ мардыл нæ аргъуыдтой, æмæ-иу уыцы гæххæтт дæр къухы æнцонæй кæм æфтыди. Сауджынæн аргъауæггаг хъуыдис тымбыл сом, сом куынæ уыдаид, уæд-иу нæ аргъуыдта. Къарджиаты Б. Ирон æгъдæуттæ. Дзæуджыхъæу, 1991