‌💢💢💢


«آنام نصیبه، قیزیم نصیبه»

یوخودا آغلاییب گورولسن بوگون
آی قیزیم نگران قویموسان بیزی
سن گؤزل باکی‌نی یوخودا گؤردو،
یوخسا حبس اولونموش آنا تبریزی؟

گؤزو قاماشدیریر دیشی‌نین آغی
یاناغین شیروانین آغ پامبیغی‌دیر
آراز قونداغی‌نین قیرمیزی باغی
گؤی-گؤل بَلَـگی‌نین گؤز مونجوغودور

ایکی وطن اولوب بیر خالقیمیزدان
ایکی سرحد اولوب وطنه بیر چای
ائله گولمه‌لیسن دانیشمالیسان!
نه اوتای اینجیسین نه‌ده کی بوتای

من بیر گوللـه‌یدیم تفنگه دولدوم
هدفه دَگمه‌دیم چیخدیم هدفدن
آرازین ایچینده بیر آدا اولدوم
نه او طرفدَ‌نـم نه بو طرفدن
هم او طرفدَ‌نـم هم بو طرفدن

بوی آت کؤرپه بالام قوووش وطنه
عؤمرونو اوتایا بوتایا باغلا
قیزیم نه وئرسه‌لر بوتایدا سنه
گؤتور اوتاییندا پایینی ساخلا

قیزیم مهندس اوْل، سو مهندسی
دنیا چایلارینی آرازا ایچیرت
یاخشی سئچ دنیادا یاخشینی پیسی
آرازی جُلفادان، سالیاندان دَگیل
آرازی زنجاندان، قزویندن گئچیرت

اورتادان آچیلمیش کتاب کیمی‌دیر
باخیر آستارالار سرحد تیرینه
سؤیکه‌نیر جُلفالار سرحد تیرینه
منیم قوللاریمی اینه ساپ ائدین
تیکین آستارانی بیر- بیرینه
چایلاری یوللاری اینه ساپ ائدین
تیکین جُلفالاری بیر- بیرینه

صاباح سن وطنه گئتمک ایسته‌سن
گرک نه اجازه نه ایذین اولسون
خَلقین بیرلشمه‌سی ائله ایندیدن
قیزیم قوی گلینلیک جهیزین اولسون

✍#سهراب_طاهیر
Bakı / 1969

#ایمگه‌لر_کانالی
✔️✔️✔️
👇👇👇
https://telegram.me/imgalar