💢💢💢


#گل_آنا!

یاشام پوزغون اولوب آنا
بوتون آنی‌لاریمیز پوزغون
هر ایشیمیز پوزغون

یادیندامی؟
رؤیالاریمدا دئمیشدین:
بورا زنگ ائتمه ناگومانا
بوردا آنتن وئرمَز تئلفون‌لار
بوردا کیمسه دستک گؤتورمَز

ایندیسه بیز اؤلمه‌میش اؤلوم یاشاییریق آنا؛
آنتن وئرمیر بارماق‌لاریمیز
هرگون دووارلار قالین‌لاشیر قارشیمیزدا
قارانلیق گئت-گئده قاتیلاشیر
ها دابانیمیزی قووزاییریق
دووارلار بیزدن اوجاراق دورور

کیم ایدی یئر اوزو بیر کوره‌سل کنددیر دئییردی؟!
بیز کی بو کندین یام-یاشیل آخار-باخارینا تامارزی باخیریق هله‌ده
و یئر اوزونون کوره‌سل‌لشمه شنلیک کارناوالینا حسرتلی

گـَل آنا قیزین قوربان سنه
گَـل قادین سسی ایله؛
آنا سسی ایله؛
چاغیر اینسانلیغی هاراییمیزا؛
دئنن: من بالاما چؤرکلی، گولوشلو و اؤزگور دونیا آرزولامیشدیم

گَـل آنا؛
یئر کوره‌سی قیزمالی‌دیر بیزیم خریطه‌ده؛
ساییقلاییر یامان؛
گَل آیاق‌لارینی سووا قوی؛
آلنینا نَملی مندیل سَر
قیزماسینی آل
سن یاخشی باجاریرسان بونلاری
دانیش منه آنا؛
دئه منه وطن؛
کوبود یومروق‌لار آغزیما توشلانمیش بو من؛
آغزی تیلت قانلی؛
بو یئرین هاراسیندا دورموشام وطن؟!

گـَل آنا؛
گَـل اینسانلیغی چاغیر هاراییمیزا
ائشیدرلر یقین؛
آنالار دونیانین هر بیر یئرینده سایغیلی‌دیرلار
آنالار اینسانلارین اورتاق دیلی‌دیرلر.

✍#سحر_خیاوی

#ایمگه‌لر_کانالی
✔️✔️✔️
👇👇👇
https://telegram.me/imgalar