💢💢💢


🔷 بایاتی‌لار

✍ شاعر: #زهرا_فردی - ساچلی
 
گۆنش سنین ،آی سنین،
سو نغمه‌لی چای سنین.
پاییز منـــــیم بسیم‌دیر،
بنؤوشـه‌لی یای سنین.

سو گلر چای دولانار،
ایل کئچر، آی دولانار.
شاعرین باخ شعرینه،
دۆنیا وار پای دولانار.

دومان آلدی داغ‌لاری،
چیچک‌لندی باغ‌لاری.
یول‌لارینی گؤل آلیب،
گاه سوْلو ،گاه ساغ‌لاری.

باهار گلیب سهنده،
گۆل سۆنبولو أڲنده.
بایاتینی یازاندا،
سیز شهره،من کنده.
 

باغچالارین یاغیشی،
گۆل - چیچکلی ناخیشی.
بایاتی اوخویانلار،
یۆز یاشاسین باخیشی.


آرازیم گؤزو دوْلو،
اۆره‌کده سؤزو دوْلو.
داغ‌لارا یاز گلنده،
چیچک‌له دۆزو دوْلو.

باهارین نفسی‌یم،
بۆلبولون اؤز سسی‌یم.
دره‌لرین اوزونو،
آخار چای نغمه‌سی‌یم.

عزیزینم باغ اولا،
یاشیل دوْندا داغ اولا.
بایاتی‌لار یازاندا،
یاغیش یاغان چاغ اولا

قارداش ائلین آدی دیر،
محبتین دادی دیر.
باجی‌سی اولان بیلر،
باجی، آنا یادی دیر.

قارداش آتا سؤزودور،
آنالارین گؤزودور.
باجی‌لارین اۆره‌ڲـی،
ایکـــــی دۆنیا اؤزودور.

قارداش اۆره‌ک دیره‌ڲـی،
دادلی‌دیردوز-چؤره‌ڲـی.
گۆزه‌ل‌لرین ایچینده،
باجی گؤیلر مله‌ڲـی.

قارداش باغین- باخچانین،
گۆلوش‌لری آخچانین.
باجی‌نین ال ایشلری،
گؤزلرینده تاخچانین.

بو داغین بره‌سینده،
چیچک‌له تره‌سینده.
یاد اوْوچولار گؤزو وار،
کهلیک‌ین فره‌سینده.

هاوا دولوب دومانا،
اۆره‌ک گلیب گۆمانا.
فلک اؤزو آغلادی،
بیزه چاتان زامانا.

من عاشێق یارا داغ‌لار،
سئللری سارا داغ‌لار.
هر گلن دؤولت گزر،
باغلانماز وارا داغ‌لار.


منیم بالام خالێ وار،
باشیندا آغ شالێ وار.
بو اوْبانین، بو ائلین،
خیاوی، خالخالێ وار.

قاشیندا وسمه بالام،
یولومو کسمه، بالام.
گاه کۆلک، گاه دا بولود،
داغ‌لاردا اسمه، بالام.

بالامی بال دئییرلر،
یاناق‌دا خال دئییرلر.
گوزلیک‌ده تایی یوخ،
دردینی آل دئییرلر.


#ایمگه‌لر_کانالی

✔️✔️✔️
👇👇👇
https://telegram.me/imgalar