💢💢💢


"چیخیب گئتمک ایسته‌ییرم

چیخیب گئتمک ایسته‌ییرم، چیخیب گئتمک...
هاردا، نئچه ایز-توزوم وار، ییغیب گئتمک...
سون گولـله‌می اؤز باشیما سیخیب گئتمک...
چیخیب گئتمک ایسته‌ییرم، چیخیب گئتمک.

بیر یاد قلبه اسیر دوشن حؤرمتیمی،
"فرقی یوخدو، او گؤردومو، گؤرمه‌دیمی"
ییغیب گئتمک ایسته‌ییرم، ییغیب گئتمک...
عؤمروم بویو ایکی هم‌رأی سس تانیدیم

خالقین سسی - حاققین سسی
حاققین سسی - خالقین سسی
یویورموشم خالقا ساری،
یئتمه‌میشم،
داها حاققین دالیسینجا گئتمه‌میشم

خالقین سسی حاق سسینه جالانماسا
هر ایکیسی، بیر اوجاغا قالانماسا،
اودامیزدا اود ساخلاماق چتین اولار،
اودسوز اوجاق اولسا بئله، یئتیم اولار.

اودو یوخسا نه‌یی وارکی، بیر میللتین؟!
اودو یوخسا، یالانی وار،
یالانی وار، تالانی وار،
یالانین دا قالانی وار،
ساتانی وار، آلانی وار...

یالان یوکو داشیماقدان یورولمادیق،
دومان بؤرکو داشیماقدان یورولمادیق...
بو گؤی آلتدا، بو یئر اوستده، یئریم داردی،
دیل تاپدیغیم آداملار یوخ، آغاج‌لاردی،
چینارلاردی، قوواق‌لاردی، پالیدلاردی،
قونشولاریم سیغیرچین‌لار، قومرولاردیر...
درد-سریمین چوخدو آردی، چوخدو آردی...

یادداشیمدا چینقیللاشان،
منسیز قالیب داریخاجاق دردلری ده،
اوره‌ییمین سیزیلدایان سسینی ده،
آنلاریمین کؤوره‌یینی، ترسینی ده،
ییغیب گئتمک ایسته‌ییرم، ییغیب گئتمک...
شیمشک کیمی هؤنکورتومو چاخیب گئتمک...

بوش وعده‌لر فخری یئرده أیلَشَنده،
بئش تعریف-کئش یئرله-گؤیله أللشنده،
یئر اوزونده یاشاماغا یئر چاتیشمیر،
بؤر-بؤجه‌یه، قورد-قوشا دا یئم چاتیشمیر،
دردیمیزی آغلاماغا، گؤز چاتیشمیر،
قایغیمیزی بؤلوشمه‌یه سؤز چاتیشمیر.

ایندی قبیر یئرلریمیز حراج-دادیر،
حتی میللی آدلاریمیز حراج-دادیر،
هاوامیزا ال اوزانیر- هاوامیزا،
ال اوزانیر دردیمیزه- داوامیزا.

کیمدی دوغان بو کین‌لری، غرضلری؟
بوغوشماغا، دیدیشمه‌یه حریصلری؟!
وارمی یازان بو اؤرنه‌یی بو درسلری؟!
یوخمو بوغان، دئییلمه‌ین بو سس‌لری؟!

ایندی واللاه، ان بیرینجی چاشقین منم.
یورددان-یوردا ان بیرینجی قاچقین منم.
نه ایتیم وار، داش آتالار، هوردوره‌لر،
نه آتیم وار، چوبوق چکیب، هورکوده‌لر،
نه قویونوم، نه قوزوم وار، قوردا قیسمت،
واریم-یوخوم بئش اون سؤزدو، یوردا قیسمت.

بو توپراقدان بیرجه اوووج تورپاق آلیب،
بیرجه کلمه خوش سؤز آلیب،
اؤز کؤکومه ییغیب گئتمک ایسته‌ییرم،
ییغیب گئتمک، چیخیب گئتمک ایسته‌ییرم،
چیخیب گئتمک...!

✍#ممد_آراز

#ایمگه‌لر_کانالی
✔️✔️✔️
👇👇👇
https://telegram.me/imgalar